الەۋمەتتىك جەلىلەردە موڭعولياداعى قازاقتار مەن موڭعولدار اراسىنداعى قارىم-قاتىناسقا قاتىستى ءتۇرلى اقپاراتتار تارالىپ جاتقان تۇستا تاريحشى جەڭىس جومارت وزىنە قاتىستى داۋلى سوزدەرگە پىكىر ءبىلدىردى، دەپ حابارلايدى «ادىرنا» ءتىلشىسى.
ونىڭ ايتۋىنشا، ول ءجيى سۇحبات بەرەدى جانە كەي جاعدايدا بەينەجازبالاردىڭ جەكەلەگەن بولىكتەرى كونتەكستەن جۇلىنىپ الىنىپ، الەۋمەتتىك جەلىلەردە اركىمنىڭ ءوز ماقساتىنا ساي تاراتىلىپ جاتادى.
جەڭىس جومارت موڭعوليانىڭ تاريحي تۇرعىدان ەرەكشە ماڭىزى بار مەكەن ەكەنىن اتاپ ءوتىپ، بۇل ەلگە، ونىڭ حالقىنا جانە باي تاريحىنا ۇلكەن قۇرمەتپەن قارايتىنىن ايتتى.
«موڭعوليا – تاريحشىلار ءۇشىن قاسيەتتى مەكەن. ءبىز بۇل جەردىڭ تاريحىنا دا، حالقىنا دا، مادەنيەتىنە دە قۇرمەتپەن قارايمىز. ەگەر ارتىق كەتىپ جاتقان جەرلەرىمىز بولسا، سىزدەر تۇسىنبەي قالعان تۇستار بولسا، ءيىلىپ تۇرىپ كەشىرىم سۇرايمىز. ءبىزدىڭ موڭعول حالقىمەن تاريحىمىز دا، تاعدىرىمىز دا ءبىر. سول جەردە تۇرىپ جاتقان حالىقتاردىڭ بارلىعىن جاقسى كورەمىز، سىيلايمىز. ولاردىڭ تاعدىرى مەن تاريحى وتە قىزىق»، – دەدى ول.
تاريحشى بولاشاقتا ەكى ەلدىڭ مادەني بايلانىستارىن دامىتۋعا، تاريحي ايماقتى ودان ءارى تەرەڭىرەك زەرتتەۋگە ۋادە بەردى.
بۇعان دەيىن الەۋمەتتىك جەلىلەردە «ادىرنا» پورتالىنا بەرگەن سۇحباتىنان ۇزىندىلەر تاراپ، ولاردىڭ موڭعول تىلىندە اۋدارىلىپ، كەڭىنەن تارالعانى حابارلانعان بولاتىن. جومارتتىڭ سوزىنشە، جاريالانعان ۇزىندىلەر تولىق سۇحباتتىڭ مازمۇنىن تولىق اشپايدى جانە كەيبىر ويلار كونتەكستەن تىس بەرىلگەن.
