موڭعوليا پرەزيدەنتى ۋحنااگين حۇرەلسۇح، ۇلى مەملەكەتتىك حۋرال توراعاسى نيام-وسورىن ۋچرال جانە پرەمەر-مينيستر گومبوجاۆىن زاندانشاتار «شىڭعىس حان» ۇلتتىق مۋزەيىندەگى «ۇلى حان» مەموريالدىق زالىندا ورنالاسقان التىن جالاتىلعان شىڭعىس حان مۇسىنىنە تاعزىم ەتتى. بۇل تۋرالى «مونتسامە» جازدى، دەپ حابارلايدى «ادىرنا» ءتىلشىسى.
مەملەكەت باسشىسىنىڭ باستاماسىمەن مەملەكەتتىڭ ءۇش ماڭىزدى نىشانى جاسالىپ، سالتاناتتى تۇردە ورناتىلعان. ولار — التىن جالاتىلعان شىڭعىس حان ءمۇسىنى، ۇلى اق شاشاقتى تۋ جانە مەملەكەتتىك ءمور.
«بۇل نىشاندار كوكتەمنىڭ العاشقى ايىنىڭ ءبىرىنشى كۇنى – جاسىل اعاشتى جىلان جىلى ورناتىلعان. شىڭعىس حان ءمۇسىنى ۇلى حاننىڭ حالىق الدىنا شىعىپ، التىن ءموردى كورسەتىپ، ۇلى موڭعول يمپەرياسىنىڭ قۇرىلعانىن جاريالاعان تاريحي ءساتتى بەينەلەيدى»،– دەلىنگەن حابارلامادا.
مەملەكەتتىك موردە: «ماڭگى كوكتىڭ كۇشىمەن ۇلى موڭعول حالقى، دالاي-حان بۇيىرادى: باعىنعان حالىقتار ونى قۇرمەتتەپ، قورىقسىن» دەگەن جازۋ قاشالعان. سونداي-اق موردە ارىستان بەينەسى بار. بۇل رامىزدەر شىڭعىس حاننىڭ يگى ىستەرىن، ۇلى يمپەريانىڭ نەگىزىن قالاۋىن جانە مەملەكەتتىلىكتىڭ ۇرپاقتان ۇرپاققا جالعاسۋ قاعيداسىن بىلدىرەدى.
ءمۇسىننىڭ وڭ جاعىندا ۇلى اق شاشاقتى تۋ ورنالاسقان. ول – موڭعول حالقىنىڭ بەيبىتشىلىك، تۇراقتىلىق جانە بىرلىك سيمۆولى بولىپ سانالادى.
