14 ماۋسىمدا اقش-تىڭ ميسسۋري شتاتىنداعى باتلەر قالاسىندا جەكە ۇشاق اپاتقا ۇشىراپ، سالدارىنان 12 ادام قازا تاپتى. بۇل تۋرالى Fox4 تەلەارناسى ايتتى، دەپ حابارلايدى «ادىرنا» ءتىلشىسى.
بەيتس وكرۋگىنىڭ توتەنشە جاعدايلار باسقارماسى وكىلىنىڭ مالىمەتىنشە، جەرگىلىكتى ۋاقىت بويىنشا شامامەن ساعات 11:30-دا باتلەر مەموريالدىق اۋەجايىنان ۇشىپ شىققان جەكە ۇشاق بەلگىسىز سەبەپپەن كەرى بۇرىلىپ، Business 49 تاسجولى ماڭىندا قۇلاعان. ۇشاق بورتىنداعى ادامداردىڭ بارلىعى كوز جۇمعان.
تەلەارنانىڭ حابارلاۋىنشا، قازا تاپقانداردىڭ 11-ءى ءپاراشيۋتشى، ال بىرەۋى ۇشقىش بولعان.
وقيعا ورنىندا قۇتقارۋ قىزمەتتەرى، ميسسۋري شتاتىنىڭ پوليتسياسى، اقش-تىڭ فەدەرالدىق ازاماتتىق اۆياتسيا باسقارماسى جانە ۇلتتىق كولىك قاۋىپسىزدىگى كەڭەسى جۇمىس ىستەپ جاتىر. قازىر اپاتقا دەيىن ۇشاقتان سەكىرىپ ۇلگەرۋى مۇمكىن پاراشيۋتشىلەردى ىزدەۋ جۇمىستارى جۇرگىزىلۋدە. تەرگەۋ بىرنەشە كۇنگە سوزىلادى دەپ كۇتىلۋدە.
وقيعاعا بايلانىستى اۋەجاي ماڭىنداعى Business 49 تاسجولىنىڭ بارلىق جولاعى ەكى باعىتتا دا ۋاقىتشا جابىلدى.
