يران ورمۋز بۇعازى بارلىق ەلدەر ءۇشىن اشىق ەكەنىن، تەك اقش، يزرايل جانە ولاردىڭ وداقتاستارىنان باسقا ەلدەرگە رۇقسات بەرىلەتىنىن مالىمدەدى. Report اگەنتتىگىنىڭ حابارلاۋىنشا، بۇل تۋرالى يراننىڭ حالىقارالىق تەڭىز ۇيىمىنداعى تۇراقتى وكىلى ءالي مۋساۆي ايتتى، دەپ حابارلايدى "ادىرنا".
ونىڭ سوزىنشە، ورمۋز بۇعازى ارقىلى كەمەلەردىڭ ءوتۋى قاۋىپسىزدىك جانە قورعاۋ شارالارىن ۇيلەستىرۋ جاعدايىندا مۇمكىن.
مۋساۆي حالىقارالىق مىندەتتەمەلەر يراننىڭ اۋماقتىق تۇتاستىعى مەن قۇقىقتارىنا قۇرمەتپەن ورىندالۋى ءتيىس ەكەنىن اتاپ ءوتتى.
سونداي-اق، ول بۇعازداعى كەمەلەر مەن ەكيپاجداردىڭ قاۋىپسىزدىگى يراندىق بيلىكپەن ۇيلەستىرىلە وتىرىپ قامتاماسىز ەتىلۋى قاجەت ەكەنىن ايتتى.
«يران تەڭىز قاۋىپسىزدىگىن ارتتىرۋ جانە تەڭىزشىلەردى قورعاۋ ماقساتىندا حالىقارالىق تەڭىز ۇيىمىمەن جانە مۇشە مەملەكەتتەرمەن ىنتىماقتاسۋعا دايىن. ديپلوماتيا – ءبىزدىڭ باستى باسىمدىعىمىز، الايدا شابۋىلداردى تولىق توقتاتىپ، ءوزارا سەنىمدى نىعايتۋ قاجەت»، — دەدى ول.
سونداي-اق، بۇگىن اقش پرەزيدەنتى دونالد ترامپ يرانعا ورمۋز بۇعازىن اشۋ ءۇشىن 48 ساعات ۋاقىت بەرگەن بولاتىن.
ول ورمۋز بۇعازى كەمەلەردىڭ ەركىن ءوتۋى ءۇشىن تولىق اشىلماسا، يراننىڭ ەلەكتر ستانتسيالارىنا سوققى جاساۋعا دايىن ەكەنىن ايتقان ەدى.
ايتا كەتەيىك، 28 اقپاندا اقش پەن يزرايل يرانعا قارسى اسكەري وپەراتسيا باستاپ، بىرنەشە قالاعا اۋە سوققىلارىن جاساعان. بۇعان جاۋاپ رەتىندە يران يزرايل اۋماعىنا زىمىراندار ۇشىرىپ، پارسى شىعاناعى ەلدەرىندەگى امەريكالىق اسكەري بازالارعا شابۋىل جاساعان. وسى جاعدايعا بايلانىستى بىرقاتار مەملەكەتتەر اۋە كەڭىستىگىن ۋاقىتشا جاپتى. سول كۇنى شابۋىلدار سالدارىنان يراننىڭ جوعارعى كوشباسشىسى ءالي حامەنەي قازا تاپتى.
