اقش قارۋلى كۇشتەرى 9 اقپاندا رەسەيگە تيەسىلى دەلىنەتىن جانە حالىقارالىق سانكتسيالاردى اينالىپ ءوتۋ ءۇشىن پايدالانىلاتىن دەپ سانالاتىن Aquila II تانكەرىن باسىپ الدى، دەپ حابارلايدى "ادىرنا" ۇلتتىق پورتالى DW-عا سىلتەپ.
باق مالىمەتىنشە، بۇل - 2025 جىلدىڭ جەلتوقسانىنان بەرى ۇستالعان جەتىنشى تانكەر.
امەريكاندىق اسكەري ۆەدومستۆونىڭ حابارلاۋىنشا، تانكەر سانكتسيا رەجيمىن بۇزۋعا ارەكەت جاساپ، بىراق اقش كۇشتەرى ونى كاريب تەڭىزىنەن ءۇندى مۇحيتىنا دەيىن قاداعالاپ، باقىلاۋعا الدى. ۆەدومستۆو بۇل ءىس-قيمىلدى «زاڭسىز ارەكەت ەتۋشىلەرگە ەشبىر ەل قارسى تۇرا المايتىنىنىڭ ايقىن كورىنىسى» دەپ سيپاتتادى.
Aquila II IMO 9281152 نومىرىمەن تىركەلگەن جانە اقش، ۇلىبريتانيا، ەو، كانادا، شۆەيتساريا جانە ۋكراينا سانكتسيالىق تىزىمدەرىنە ەنگىزىلگەن.
تانكەر رەسەي مەن ۆەنەسۋەلا مۇنايىن تاسىمالداۋمەن اينالىسىپ، كەيدە ترانسپوندەرىن ءوشىرىپ، ورنالاسقان ورنىن جاسىرۋ تاسىلدەرىن قولدانادى. ول Sunne Co Limited كومپانياسىنا بايلانىستىرىلىپ، اقش تاراپىنان 2025 جىلدىڭ قاڭتارىندا سانكتسياعا ىلىنگەن. تانكەر رەسەي مەن ۆەنەسۋەلا پورتتارىنان، سونىڭ ىشىندە قىتايعا تاۋار جەتكىزەدى دەپ ەسەپتەلەدى.
سانكتسيالىق شارالاردى بۇزۋعا جول بەرمەۋ ءۇشىن اقش 2025 جىلدىڭ جەلتوقسانىنان بەرى جەتى تانكەردى ۇستاعان. بۇعان دەيىن 15 قاڭتاردا Veronica تانكەرى ۇستالعان بولاتىن. Reuters اگەنتتىگىنىڭ حابارلاۋىنشا، بارلىق ۇستالعان كەمەلەر "كولەڭكەلى فلوتقا" جاتقىزىلىپ، رەسەي، يران جانە ۆەنەسۋەلا مۇنايىنىڭ شىعۋ تەگىن جاسىرۋ سحەماسىنا قاتىسى بار دەپ ەسەپتەلەدى.
باق-تا ۆاشينگتوننىڭ مۇنداي قاتاڭ شارالارعا بارۋى دونالد ترامپتىڭ ۆلاديمير پۋتينگە قارسى نارازىلىعىنىڭ كۇشەيۋىمەن بايلانىستى ەكەنى حابارلانعان.
