فوتو: halyq uni
قازاقستان پرەزيدەنتى قاسىم-جومارت توقاەۆ مەملەكەتتىك كۇزەت قىزمەتىنىڭ (مكق) وكىلەتتىگىن كەڭەيتەتىن، سونىڭ ىشىندە ونىڭ قىزمەتكەرلەرىنە تەرروريزمگە قارسى وپەراتسيا (تقو) جۇرگىزۋ ايماعىندا تەررورشىلارعا قارسى ەسكەرتۋسىز قارۋ قولدانۋ قۇقىعىن بەرەتىن زاڭعا قول قويدى. بۇل تۋرالى اقوردا جاريالادى، دەپ حابارلايدى "ادىرنا".
«انتيتەررورلىق وپەراتسيا جۇرگىزۋ ايماعىندا انتيتەررورلىق وپەراتسياعا قاتىسۋشى قازاقستان رەسپۋبليكاسى مەملەكەتتىك كۇزەت قىزمەتىنىڭ قىزمەتكەرلەرى جانە (نەمەسە) اسكەري قىزمەتشىلەرى تەررورشىلارعا قارسى كۇش قولدانۋعا، قىزمەتتىك جانۋارلاردى، ارنايى قۇرالداردى، قارۋدى، جاۋىنگەرلىك جانە وزگە دە تەحنيكانى وسى زاڭدا جانە قازاقستان رەسپۋبليكاسىنىڭ وزگە دە زاڭدارىندا كوزدەلگەن ەسكەرتۋسىز جانە شەكتەۋسىز قولدانۋعا قۇقىلى»، - دەلىنگەن زاڭدا.
زاڭعا 10 ماۋسىمدا قول قويىلدى جانە ول العاشقى رەسمي جاريالانعان كۇنىنەن كەيىن كۇنتىزبەلىك 60 كۇن وتكەن سوڭ قولدانىسقا ەنگىزىلەدى.
ەسكە سالساق، بۇعان دەيىن سەنات «ارنايى مەملەكەتتىك ورگانداردىڭ قىزمەتى ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭدى ەكى وقىلىمدا قابىلداعانىن حابارلاعان ەدىك.
