فوتو: prosports.kz
قازاقستاندا سپورتشىلار، جاتتىقتىرۋشىلار مەن سپورت تورەشىلەرىنە قاتىستى ەتيكا تالاپتارى ەنگىزىلدى. ەندى ولارعا بەيادەپ سوزدەر قولدانۋعا، ءدىني كوزقاراسىن جاريا كورسەتۋگە جانە ءدىني ۇگىت-ناسيحات جۇرگىزۋگە تىيىم سالىنادى. بۇل تۋرالى 2025 جىلعى 27 ماۋسىمدا تۋريزم جانە سپورت ءمينيسترى ەربول مىرزابوسىنوۆ قول قويعان «قازاقستان رەسپۋبليكاسىنىڭ سپورتتىق ەتيكاسىن بەكىتۋ تۋرالى» بۇيرىعىندا جازىلعان, دەپ حابارلايدى “ادىرنا”.
جاڭا تالاپتار سپورتشىلارعا، جاتتىقتىرۋشىلارعا، تورەشىلەر مەن وقىتۋشىلارعا بىردەي قولدانىلادى. ەندى ولارعا:
- جاتتىعۋ نە جارىس كەزىندە ءدىني كوزقاراسىن جاريا ەتۋگە;
- باسقا ادامدى ءدىني ۇيىمعا تارتۋعا نەمەسە ميسسيونەرلىك ارەكەتكە ۇگىتتەۋگە;
- قوعامدىق ورىنداردا ماس كۇيىندە جۇرۋگە;
- جارىس نە جاتتىعۋ جايلى جاسىرىن اقپاراتتى جاريالاۋعا;
- ساياسي ۇراندار كوتەرۋگە تىيىم سالىندى.
بۇعان قوسا، ەتيكا نورمالارىنا سايكەس، سپورتشىلار قازاقستاننىڭ مەملەكەتتىك رامىزدەرىنە قۇرمەتپەن قاراۋى، ءانۇران ءماتىنىن ءبىلۋى، جانە ماراپاتتاۋ ساتىندە جارتىلاي جالاڭاش نەمەسە بەيرەسمي كيىممەن شىقپاۋى ءتيىس.
جاڭا ەرەجە 2025 جىلعى 19 شىلدەدەن باستاپ كۇشىنە ەنەدى. مينيسترلىكتىڭ مالىمدەۋىنشە، بۇل ەرەجە — قوعامدىق تۇراقتىلىقتى ساقتاۋ جانە سپورتشىلاردىڭ بەيتاراپتىعىن قامتاماسىز ەتۋ ماقساتىندا قابىلدانعان. ياعني، سپورت – ساياسات پەن دىنگە ەمەس، ادەپ پەن ادال باسەكەگە نەگىزدەلۋى كەرەك دەگەن ۇستانىم باسىم. الەۋمەتتىك جەلى قولدانۋشىلارى اراسىندا بۇل شەكتەۋ قوعامدى ارتىق رەتتەۋ دەپ قابىلداعاندار دا، قاجەتتى ءارى ۋاقىتىلى قادام دەپ باعالاعاندار دا بار.
