قازاقستاندا مەكتەپ وقۋلىقتارىن جاڭارتۋ جوسپارلانىپ وتىر. بۇل تۋرالى پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا ايتتى، دەپ حابارلايدى «ادىرنا» ءتىلشىسى.
ول قازىرگى قولدانىستاعى وقۋلىقتارعا جۇرگىزىلگەن تالداۋ ناتيجەسىندە 700-دەن استام ءارتۇرلى ەسكەرتۋ مەن قاتە انىقتالعانىن مالىمدەدى.
«ولاردىڭ قاتارىندا تەحنيكالىق جانە ستيلدىك كەمشىلىكتەر، دەرەكتىك قاتەلەر، مازمۇنعا سايكەس كەلمەيتىن يلليۋستراتسيالار، جەكەلەگەن ماتەريالداردىڭ وقۋ باعدارلامالارىمەن ۇيلەسپەۋى، سونداي-اق ەسكىرگەن ءادىس-تاسىلدەر مەن تۇجىرىمدامالاردىڭ قولدانىلۋى بار. اسىرەسە ۇلتتىق مازمۇنعا لايىقتاپ بەيىمدەلمەگەن ماتەريالداردىڭ پايدالانىلۋى، ماتەماتيكا پانىندەگى قاتە انىقتامالار مەن ەسەپ شىعارۋ جولدارى، وقۋ باعدارلاماسىندا كوزدەلمەگەن شىعارمالاردىڭ ەنگىزىلۋى، سونداي-اق تاريحي وقيعالارعا قاتىستى جاڭساق پايىمدار ەرەكشە الاڭداۋشىلىق تۋعىزىپ وتىر»،–دەدى مينيستر.
ايدا بالاەۆا كەيبىر وقۋ باسىلىمى 9 جىلعا دەيىن مازمۇندىق جاعىنان جاڭارتىلماي پايدالانىلىپ كەلگەنىن جەتكىزدى. ايتۋىنشا، وسىعان بايلانىستى وقۋلىقتاردى ۋاقتىلى جاڭارتۋ ءبىلىم ساپاسىن ارتتىرۋدىڭ ماڭىزدى شارتى رەتىندە قاراستىرىلىپ وتىر.
«وقۋ-اعارتۋ مينيسترلىگى وقۋلىقتاردى كەزەڭ-كەزەڭىمەن جاڭارتىپ، مەكتەپتەردى جاڭا وقۋ باسىلىمدارىمەن قامتاماسىز ەتۋدى جوسپارلاپ وتىر. اتاپ ايتقاندا، 2026 جىلعى 30 تامىزعا دەيىن 3 جانە 7-سىنىپتارعا ارنالعان وقۋلىقتار، 2027 جىلعى 1 قاڭتارعا دەيىن 4 جانە 9-سىنىپ وقۋلىقتارى، ال 2027 جىلعى 1 ساۋىرگە دەيىن 8-سىنىپ وقۋلىقتارى جاڭارتىلادى.
ءبىزدىڭ باستى ماقساتىمىز - قازاقستانداعى ءاربىر مەكتەپتى زاماناۋي، مازمۇنى مۇقيات سارالانعان، وزەكتى بىلىمگە، «ادال ازامات» بىرىڭعاي تاربيە باعدارلاماسىنىڭ قۇندىلىقتارىنا جانە مەملەكەتتىك باسىمدىقتارعا نەگىزدەلگەن ساپالى وقۋلىقتارمەن قامتاماسىز ەتۋ. اتا-انالار دا، ۇستازدار قاۋىمى دا، جالپى قوعام دا بىزدەن وسى جاۋاپتى جۇمىستى ساپالى ءارى جۇيەلى اتقارۋدى كۇتەدى»،–دەدى ول.
