Qazaqstanda mektep oqulyqtaryn jaŋartu josparlanyp otyr. Būl turaly Premer-ministrdıŋ orynbasary – Mädeniet jäne aqparat ministrı Aida Balaeva aitty, dep habarlaidy «Adyrna» tılşısı.
Ol qazırgı qoldanystaǧy oqulyqtarǧa jürgızılgen taldau nätijesınde 700-den astam ärtürlı eskertu men qate anyqtalǧanyn mälımdedı.
«Olardyŋ qatarynda tehnikalyq jäne stildık kemşılıkter, derektık qateler, mazmūnǧa säikes kelmeitın illiustrasiialar, jekelegen materialdardyŋ oqu baǧdarlamalarymen üilespeuı, sondai-aq eskırgen ädıs-täsılder men tūjyrymdamalardyŋ qoldanyluy bar. Äsırese ūlttyq mazmūnǧa laiyqtap beiımdelmegen materialdardyŋ paidalanyluy, matematika pänındegı qate anyqtamalar men esep şyǧaru joldary, oqu baǧdarlamasynda közdelmegen şyǧarmalardyŋ engızıluı, sondai-aq tarihi oqiǧalarǧa qatysty jaŋsaq paiymdar erekşe alaŋdauşylyq tuǧyzyp otyr»,–dedı ministr.
Aida Balaeva keibır oqu basylymy 9 jylǧa deiın mazmūndyq jaǧynan jaŋartylmai paidalanylyp kelgenın jetkızdı. Aituynşa, osyǧan bailanysty oqulyqtardy uaqtyly jaŋartu bılım sapasyn arttyrudyŋ maŋyzdy şarty retınde qarastyrylyp otyr.
«Oqu-aǧartu ministrlıgı oqulyqtardy kezeŋ-kezeŋımen jaŋartyp, mektepterdı jaŋa oqu basylymdarymen qamtamasyz etudı josparlap otyr. Atap aitqanda, 2026 jylǧy 30 tamyzǧa deiın 3 jäne 7-synyptarǧa arnalǧan oqulyqtar, 2027 jylǧy 1 qaŋtarǧa deiın 4 jäne 9-synyp oqulyqtary, al 2027 jylǧy 1 säuırge deiın 8-synyp oqulyqtary jaŋartylady.
Bızdıŋ basty maqsatymyz - Qazaqstandaǧy ärbır mekteptı zamanaui, mazmūny mūqiiat saralanǧan, özektı bılımge, «Adal azamat» bıryŋǧai tärbie baǧdarlamasynyŋ qūndylyqtaryna jäne memlekettık basymdyqtarǧa negızdelgen sapaly oqulyqtarmen qamtamasyz etu. Ata-analar da, ūstazdar qauymy da, jalpy qoǧam da bızden osy jauapty jūmysty sapaly ärı jüielı atqarudy kütedı»,–dedı ol.
