قازاقستان رەسپۋبليكاسى مادەنيەت جانە اقپارات مينيسترلىگىنىڭ كەڭەيتىلگەن القا وتىرىسىندا ۆەدومستۆو باسشىسى ايدا بالاەۆا كينويندۋستريانى ودان ءارى دامىتۋعا جانە «قازاقفيلمنىڭ» ءتيىمدى ءارى قارجىلاي تۇراقتى قىزمەتىن قامتاماسىز ەتۋگە باعىتتالعان نەگىزگى مىندەتتەرگە نازار اۋداردى.
ەل پرەزيدەنتى قول قويعان زاڭعا سايكەس، قازاقستاندا تۇسىرىلەتىن فيلمدەردى قارجىلاندىرۋدىڭ كەمىندە 30%-ى تىكەلەي «قازاقفيلمگە» باعىتتالادى.
«مەملەكەتتەن بولىنەتىن ءار تيىننىڭ ەسەبى، سۇراۋى بار. سوندىقتان، بۇل قاراجات ساراپتاۋدان وتكەن لايىقتى تۋىندىلارعا عانا بولىنەدى. ەگەر فيلم تۇسىرۋگە نيەتتى ازاماتتار ءوز جوباسىنا بەلگىلى ءبىر پايىزدىق قاراجات قۇياتىن بولسا، «قازاقفيلم» قالعان قاراجاتتى ءبولىپ، اۆتورلارمەن بىرلەسە جۇمىس ىستەيدى. وسىلايشا، ەكى تاراپ تا مەملەكەتتىك قاراجاتتى قايتارۋعا مۇددەلى بولادى»، – دەپ اتاپ ءوتتى ايدا بالاەۆا.
سوڭعى بەس جىلدا مەملەكەتتىك قارجىلاندىرۋ ەسەبىنەن قازاقستاندا 55 كوركەم فيلم ءتۇسىرىلدى، ونىڭ ىشىندە 2024 جىلى 16 ۇلتتىق فيلم جارىققا شىققان. ال بيىل مەملەكەتتىك قولداۋ اياسىندا 14 جاڭا تۋىندى جارىق كورەدى دەپ جوسپارلانىپ وتىر.
سونىمەن قاتار، وتكەن جىلى «قازاقانيماتسيا» شىعارماشىلىق بىرلەستىگى اياسىندا 13 سەريادان تۇراتىن انيماتسيالىق ءفيلمنىڭ ءوندىرىسى اياقتالدى. 2025 جىلى وسىنداي تاعى 10 جوبا جۇزەگە اسىرىلماق.
كاسىبي ماماندار مەن كورەرمەن تاراپى وتاندىق سەريالدار ساپاسىنىڭ ارتقانىن اتاپ وتۋدە. 2024 جىلى مەملەكەتتىك تاپسىرىس اياسىندا 41 سەريال ءتۇسىرىلىپ، كوپشىلىككە ۇسىنىلدى. ولاردىڭ اراسىندا لۋدومانيا، قارجى پيراميدالارى، ينتەرنەت-الاياقتىق جانە ناشاقورلىقپەن كۇرەس تۋرالى باياندايتىن تۋىندىلار دا بار.
«سەريال وندىرۋشىلەر وتاندىق اۋديتوريامەن عانا شەكتەلىپ قالماي، سەريالداردى حالىقارالىق دەڭگەيگە شىعارۋ، شەت ەلدەرگە ساتۋ ماسەلەلەرىنە دە كوڭىل بولگەن ءجون»، – دەدى مينيستر.
سونداي-اق، مينيستر كينوتەاترلاردا كوپشىلىك نارازىلىعىن تۋدىراتىن فيلمدەردى سۇزگىدەن وتكىزۋ ماسەلەسىن قوزعادى. اتاپ ايتقاندا، ادەپسىز سوزدەر مەن ارازدىق تۋعىزاتىن سيۋجەتتەرى بار تۋىندىلارعا قاتىستى پىكىرىن ءبىلدىردى.
قازىرگى ۋاقىتتا مينيسترلىك قازاقستاندىق جانە شەتەلدىك فيلمدەرگە پروكاتتاۋ كۋالىگىن بەرۋ بويىنشا قولدانىستاعى زاڭنامانى كۇشەيتۋ جۇمىستارىن جۇرگىزۋدە.
