الماتىدا ءال-فارابي داڭعىلىندا ءۇش ادامنىڭ قازا بولۋىنا اكەلگەن جول-كولىك وقيعاسى بويىنشا سوت پروتسەسى جالعاسىپ جاتىر. بۇگىن، 8 ماۋسىمدا ءۇشىنشى مارقۇم توميريس قىدىربەكتىڭ وتباسى ءسوز سويلەدى، دەپ حابارلايدى «ادىرنا» ءتىلشىسى.
مارقۇمنىڭ اناسى الەكساندر پاكقا ارىز-شاعىمى جوق ەكەنىن جەتكىزىپ، ءوز قولىمەن ءوتىنىش جازعانىن ايتتى.
«جول-كولىك وقيعاسىنىڭ اۋىر سالدارىنا جانە قىزىمنىڭ قازاسىنا قاراماستان، مەن جانە مەنىڭ جاقىن تۋىستارىم پاكقا كەشىرىم بەردىك جانە تولىق تاتۋلاستىق. ايىپتالۋشى كىناسىن تولىق مويىنداپ، كەشىرىم سۇرادى، كەلتىرىلگەن ماتەريالدىق جانە مورالدىق شىعىندى تولىق وتەدى. قازىرگى ۋاقىتتا ەشقانداي ماتەريالدىق نەمەسە مورالدىق تالابىمىز جوق جانە بولاشاقتا دا بولمايدى. تاتۋلاسۋ ەرىكتى تۇردە جۇزەگە استى، سالدارى ءتۇسىندىرىلدى، شەشىم سانالى تۇردە قابىلداندى»، – دەلىنگەن وتىنىشتە.
ايتا كەتەيىك، ساعات 10:00-گە بەلگىلەنگەن سوت وتىرىسى 45 مينۋت كەشىگىپ باستالدى. بەلگىلى بولعانداي، كۋاگەرلەردىڭ ءبىرى ونلاين فورماتتا سوتقا قوسىلا الماعان.
قايعىلى جول اپاتى 21 ناۋرىزعا قاراعان ءتۇنى ءال-فارابي داڭعىلى مەن مەڭدىقۇلوۆ كوشەسىنىڭ قيىلىسىندا بولعان ەدى. تەرگەۋ نۇسقاسى بويىنشا، Zeekr كولىگىنىڭ جۇرگىزۋشىسى قارسى قوزعالىس جولاعىنا شىعىپ كەتىپ، Mercedes اۆتوكولىگىمەن سوقتىعىسقان. سونىڭ سالدارىنان Mercedes جۇرگىزۋشىسى مەن ەكى جولاۋشىسى قازا تاپقان. مارقۇمداردىڭ وتباسىلارى Zeekr جۇرگىزۋشىسىنە شارتتى جازا سۇراپ وتىر.
اۋىر رەزونانستى جول اپاتىنا قاتىستى ءىستى الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى قاراپ جاتىر.
