2026 جىلعى 16 قاڭتار كۇنى شامامەن ساعات 01:03-تە KZ-11 "دوسسور – قۇلسارى – بەينەۋ – سايوتەس – شەتپە – جەتىباي – اقتاۋ" اۆتوموبيل جولىنىڭ 383-ءشى شاقىرىمىندا Yutong ماركالى جولاۋشىلار اۆتوبۋسىنىڭ قاتىسۋىمەن جول-كولىك وقيعاسى ورىن الدى. اۆتوبۋس 2025 جىلدىڭ 19 جەلتوقسانىندا تەحنيكالىق بايقاۋدان وتكەن جانە "CASPIAN TRANS CORPORATION" LLC كومپانياسىندا تىركەلگەن.
الدىن الا مالىمەت بويىنشا، اقتاۋ قالاسىنان بەينەۋ اۋىلى باعىتىندا كەلە جاتقان اۆتوكولىك جۇرگىزۋشىسى ءرۋلدى باسقارا الماي، كولىك اۋدارىلىپ كەتكەن.
"جول-كولىك وقيعاسى سالدارىنان وقيعا ورنىندا ءتورت جولاۋشى قازا تاۋىپ، ءۇش ادام ءارتۇرلى دارەجەدەگى جاراقات الىپ، مەديتسينالىق مەكەمەلەرگە جەتكىزىلدى. اۆتوبۋستا بارلىعى 50 ادام بولعان", دەلىنگەن كولىك مينيسترلىگى حابارلاماسىندا.اتالعان اۆتوجول ۋچاسكەسى تەحنيكالىق II ساناتقا جاتادى. جول جامىلعىسى اسفالتبەتوندى، جولدىڭ ەنى 9 مەتردى قۇرايدى، جول جامىلعىسىندا اقاۋلار انىقتالعان جوق. جول بەلگىلەرى بەكىتىلگەن ديسلوكاتسياعا سايكەس تولىق كولەمدە ورناتىلعان. وقيعا تاۋلىكتىڭ قاراڭعى ۋاقىتىندا ورىن العان.
جول-كولىك وقيعاسى كەزىندە كولىك قۇرالىن 1985 جىلى تۋعان جۇرگىزۋشى باسقارعان. الدىن الا مالىمەت بويىنشا، جول-كولىك وقيعاسى بولعان جەردەن شامامەن 200 كم بۇرىن ەكىنشى جۇرگىزۋشىگە اۋىسۋ جۇزەگە اسىرىلعان.
اتالعان جول-كولىك وقيعاسى فاكتىسى بويىنشا ماڭعىستاۋ وبلىسى پوليتسيا دەپارتامەنتى بارلىق ءمان-جايلاردى انىقتاۋعا باعىتتالعان قاجەتتى تەرگەۋ شارالارىن جۇرگىزۋدە.
