Qyrǧyzstannyŋ Ystyqköl oblysynda qūtqaruşylar men erıktıler sel aǧyny alyp ketken 8-synyp oquşysyn ızdestırude. Oqiǧa jergılıktı tūrǧyndar «Nazarbaevtyŋ saiajaiy» dep ataityn rezidensiia maŋynda bolǧan, dep habarlaidy “Adyrna”.
Instagram jelısındegı qoldanuşy Jänıbek Amanbekovtıŋ mälımetınşe, Ystyqkölde auqymdy ızdestıru-qūtqaru operasiiasy jürgızılıp jatyr. Aldyn ala aqparat boiynşa, küştı sel jürgen kezde jasöspırım kölıkten sekırıp şyǧyp, aman qaluǧa tyrysqan.
Qaiǧyly oqiǧa 5 mausym künı keşke Balyqşy – Ananevo – Qaraköl tas jolynyŋ 92-şaqyrymynda bolǧan. Sel tasqyny joldy basyp, Mercedes Sprinter jäne Ford Mondeo kölıkterın zaqymdaǧan.
Ökınışke qarai, 2008 jyly tuǧan taǧy bır jasöspırımnıŋ mäiıtı tabylǧan. Qazırgı uaqytta oqiǧa ornynda täulık boiy 291 adam men 20 arnaiy tehnika jūmys ısteude. Joldyŋ ekı baǧyty da kölık qozǧalysyna aşylǧanymen, joǧalǧan balany ızdeu jäne joldardy tazartu jūmystary jalǧasyp jatyr.
Jergılıktı BAQ jariialaǧan kadrlarda oqiǧa orny būrynǧy Komsomol kentı, qazırgı Bulan-Sögöttü auyly ekenı körsetılgen. Eldı meken Avrora sanatoriiı maŋynda ornalasqan.
«Seichas KG» resursy taratqan videodaǧy avtordyŋ aituynşa, būl aumaqta 2024 jyldyŋ tamyz aiynda da sel jürgen. Sol kezde bülıngen qorşau keiın qalpyna keltırılgenımen, biylǧy selden keiın qaitadan jer astynda qalyp qoiǧan.
«Mūnda būryn qorşau bolǧan. Ony qalpyna keltırgen edı, bıraq qaitadan jer astyna ketıp qalǧan siiaqty. Būl — Nazarbaevtyŋ saiajaiynyŋ qorşauy. Qazır jūmystar jürgızılıp jatyr. Bälkım, qorşau jer astynan tabylar», – deidı video avtory.
