قىرعىزستاننىڭ ماسكەۋدەگى ەلشىلىگى رەسەي سىرتقى ىستەر مينيسترلىگىنە نوتا جولدادى، دەپ حابارلايدى “ادىرنا”.
ەلشىلىك اسكەري قىزمەتكە الداۋ جولىمەن تارتىلعان 21 جاستاعى ازاماتتى ەلگە قايتارۋعا كومەك كورسەتۋدى سۇرادى.
ۆەدومستۆونىڭ مالىمەتىنشە، ە.ت. ەسىمدى ازامات بەلگىسىز ادامداردىڭ الاياقتىق ارەكەتتەرى سالدارىنان رەسەيدەگى اسكەري بولىمدەردىڭ بىرىنە تاپ بولعان. قىرعىزستاننىڭ ديپلوماتيالىق وكىلدىگى رەسەيدىڭ قۇزىرلى ورگاندارىنا دا رەسمي حات جولداپ، وقيعانى جان-جاقتى تەكسەرۋدى، كىنالىلەردى انىقتاپ، جاۋاپكەرشىلىككە تارتۋدى تالاپ ەتكەن.
«ازاتتىق ازيا» باسىلىمىنىڭ حابارلاۋىنشا، ماناس قالاسىنىڭ 21 جاستاعى تۇرعىنى ەليستان توكتوگۋلوۆتى قايتارۋ تۋرالى نوتا جىبەرىلگەن.
تۋىستارىنىڭ ايتۋىنشا، جاس جىگىت ەكى اپتا بۇرىن رەسەيگە جۇمىس ىزدەپ كەتكەن. ول Instagram الەۋمەتتىك جەلىسىنەن جۇك كولىگىنىڭ جۇرگىزۋشىسى جانە كۇزەت قىزمەتكەرى سياقتى بىرنەشە جۇمىس ۇسىنىسىن كورگەن. وعان ايىنا 110 مىڭ رۋبلگە دەيىن جالاقى ۋادە ەتىلگەن.
الايدا قازىر ەليستاننىڭ ۆورونەج وبلىسىنداعى اسكەري پوليگوندا ەكەنى بەلگىلى بولدى. تۋىستارىنىڭ مالىمەتىنشە، ونى ۋكرايناداعى سوعىسقا جىبەرۋگە دايىنداپ جاتىر.
قىرعىزستاننىڭ ءسىم ازاماتتىڭ تۋىستارىمەن تۇراقتى بايلانىستا ەكەنىن ايتتى.
ايتا كەتەيىك، بۇعان دەيىن قازاقستان سىرتقى ىستەر مينيسترلىگى دە رەسەيدە اسكەري كەلىسىمشارتقا قول قويۋعا ءماجبۇر بولعان ازاماتتاردى ەلگە قايتارۋعا جاردەمدەسۋدى سۇراپ، ماسكەۋگە نوتا جولداعان. قازان ايىنىڭ سوڭىندا باق-تا رەسەيگە جۇمىس ىستەۋگە بارىپ، اسكەرگە تارتىلعان 12 قازاقستاندىقتىڭ ەلگە ورالعانى تۋرالى اقپارات تارادى.
