7 ساۋىردە كەشكى ساعات سەگىزدەگى جاعداي بويىنشا، سولتۇستىك قازاقستان وبلىسىنداعى سەرگەەۆ سۋ قويماسىنىڭ تولىمدىلىعى 175 پايىز بولعان (كولەمى - 1213 ميلليون تەكشە مەتر). بۇل تۋرالى پەتروپاۆلوۆسك.news پورتالى جاريالادى، دەپ حابارلايدى “ادىرنا” ۇلتتىق پورتادى.
سۋ قويماسىنىڭ دەڭگەيى 1190 سانتيمەتر (شەگى – 800). بوگەت توبەسىنەن اسىپ كەتۋ 390 سانتيمەتر (سوڭعى 12 ساعاتتا 55 سانتيمەتر).
بۇل 2017 جىلعى تاريحي ماكسيمۋمنان 52 سانتيمەترگە ارتىق، بوگەتتەن اسىپ كەتۋ 338 سانتيمەت بولعان، مۇنداي سەرگەەۆ سۋ قويماسى پايدالانۋعا بەرىلگەننەن بەرى، ياعني 1968 جىلدان بەرى بايقالماعان.
سەرگەەۆ سۋ ەلەكتر كەشەنىنەن جوعارى قاراي ەسىل سالالارىنىڭ سۋى كۇرت ازايا باستاعان. بۇل سۋ تاسقىنى شەگىنىڭ سەنىمدى بەلگىسى، دەپ تۇسىندىرەدى باسىلىم. سونداي-اق، سەرگەەۆ سۋ قويماسىنداعى سۋ دەڭگەيىنىڭ كوتەرىلۋى جەكسەنبى تۇستەن كەيىن ايتارلىقتاي باياۋلاعان.
"ەندى سەرگەەۆ سۋ قويماسى بوگەتىنىڭ تومەنگى جاعىنداعى ەلدى مەكەندەر ءۇشىن دە، ءىرى كولدەر ماڭىنداعى اۋىلدار ءۇشىن دە قاۋىپتى كەزەڭ باستالادى: ۇلكەن توراڭعىل ويانادى", - دەلىنگەن ماقالادا.
سونىمەن قاتار، مەملەكەت باسشىسى قاسىم-جومارت توقاەۆ اقمولا، اقتوبە، قوستاناي جانە سولتۇستىك قازاقستان وبلىستارىنىڭ اكىمدەرىمەن تەلەفون ارقىلى سويلەستى.
اتالعان وبلىستاردىڭ اكىمدەرى پرەزيدەنتكە وڭىرلەردەگى احۋال جايىندا، تابيعي اپاتپەن كۇرەسۋ جانە سۋ تاسقىنىنىڭ زارداپتارىن جويۋ ءۇشىن قابىلدانعان شارالار جونىندە ەسەپ بەردى.
ايماق باسشىلارىنىڭ ايتۋىنشا، جالپى جاعداي ءجىتى باقىلاۋدا، تابيعي اپاتپەن كۇرەسۋ ءۇشىن ادام كۇشى دە، تەحنيكا دا جەتكىلىكتى.
پرەزيدەنتتىڭ تاپسىرماسىمەن رەسپۋبليكالىق شتابقا جەتەكشىلىك ەتەتىن پرەمەر-مينيستر ولجاس بەكتەنوۆ باستاعان ۇكىمەت مۇشەلەرى سۋ تاسقىنىنان زارداپ شەككەن ايماقتارعا جىبەرىلگەن بولاتىن. ازاماتتاردىڭ قاۋىپسىزدىگىن قامتاماسىز ەتۋ، ولاردىڭ كەرەك-جاراعىن شەشۋ باعىتىندا اۋقىمدى جۇمىس اتقارىلىپ جاتىر.
