الماتى قالاسىنىڭ ارنايى پروكۋرورلارى ەسىرتكى زاتتارىنىڭ اسا ءىرى كولەمدەگى كونترابانداسى فاكتىسى بويىنشا سوتقا دەيىنگى تەرگەپ-تەكسەرۋدى اياقتادى. بۇل تۋرالى قالالىق پروكۋراتۋرا جازدى، دەپ حابارلايدى «ادىرنا» ءتىلشىسى.
تەرگەۋ بارىسىندا جازاسىن پەنيتەنتسيارلىق مەكەمەدە وتەپ جاتقان سوتتالعان ادام اقش-تان الماتىعا ماريحۋانا مەن كاننابيس سىعىندىسى سالىنعان سالەمدەمەلەردى جەتكىزۋ ارناسىن ۇيىمداستىرعانى انىقتالعان.
قىلمىستىق ارەكەتكە ۇيىمداستىرۋشىلار، كۋراتورلار، قامقورشىلار، دروپپەرلەر، جاسىرىن بەلگىلەۋشىلەر جانە ولشەپ وراۋشىلار تارتىلعان.
جەدەل ءىس-شارالار ناتيجەسىندە «جەتىسۋ» كەدەن بەكەتىندە سالماعى 43 كگ قۇرايتىن ماريحۋانا مەن كاننابيس سىعىندىسى سالىنعان 25 سالەمدەمە تاركىلەنگەن. ولار ءىس بويىنشا زاتتاي دالەلدەمەلەر دەپ تانىلدى.
«تەرگەۋ جانە جەدەل-ىزدەستىرۋ ءىس-شارالارىنىڭ كەشەنى، سونداي-اق سوت ساراپتامالارىنىڭ ناتيجەلەرى، ايىپتالۋشىلاردىڭ قۇقىققا قارسى قىزمەتىن راستادى. 20 كۇدىكتى، ونىڭ ىشىندە ۇلتتىق قاۋىپسىزدىك ورگانىنىڭ 2 قىزمەتكەرى جانە قىلمىستىق توپتىڭ قىزمەتىنە قامقورلىق كورسەتكەن قر ءىىم قاجك-ءنىڭ 3 قىزمەتكەرى ۇستالدى»،—دەلىنگەن حابارلامادا.
ءىس بويىنشا ايىپتالۋشىلارعا ەسىرتكى زاتتارىن كونتراباندالاعانى جانە ساتقانى، سونداي-اق لاۋازىمدىق قىلمىستارى ءۇشىن جاۋاپتىلىقتى كوزدەيتىن باپتار بويىنشا ايىپ تاعىلدى.
زاڭسىز قىزمەتتەن الىنعان تابىستى كۇدىكتىلەر جىلجىمايتىن مۇلىكتى، جەر ۋچاسكەلەرىن جانە اۆتوكولىك قۇرالدارىن ساتىپ الۋ جولىمەن زاڭداستىرعان. سوتتىڭ سانكتسياسىمەن 5 پاتەرگە، 3 قۇرىلىسقا، 10 جەر ۋچاسكەسىنە جانە 44 اۆتوكولىك قۇرالىنا تىيىم سالىندى.
