قازاقستاندا جۇرگىزىلىپ جاتقان «قاراسورا-2026» رەسپۋبليكالىق جەدەل-پروفيلاكتيكالىق ءىس-شاراسى اياسىندا 550 كەلىگە جۋىق ەسىرتكى تاركىلەندى، دەپ حابارلايدى "ادىرنا" ۇلتتىق پورتالى.
قۇقىق قورعاۋ ورگاندارى قاراسورا القاپتارىن انىقتاۋ ءۇشىن تىكۇشاقتار، دروندار جانە عارىشتىق مونيتورينگ جۇيەلەرىن پايدالانىپ جاتىر.
ىشكى ىستەر مينيسترلىگىنىڭ مالىمەتىنشە، وپەراتسيا ماۋسىم ايىنان بەرى قاراسورا وسەتىن وڭىرلەردە جۇرگىزىلۋدە. ءىس-شاراعا پوليتسيا قىزمەتكەرلەرىمەن قاتار ۇلتتىق ۇلان اسكەري قىزمەتشىلەرى مەن قورعانىس مينيسترلىگىنىڭ بولىمشەلەرى جۇمىلدىرىلعان.
ىزدەۋ جۇمىستارى بارىسىندا زاماناۋي تەحنولوگيالار كەڭىنەن قولدانىلۋدا. اسىرەسە شۋ وڭىرىندە درونداردىڭ كومەگىمەن جابايى قاراسورانىڭ ونداعان وشاعى انىقتالىپ، جويىلعان. سونىمەن قاتار وپەراتسياعا كينولوگتار مەن قىزمەتتىك يتتەر دە تارتىلعان. ولار اۆتوجولداردا، تەمىرجول نىساندارىندا جانە ەسىرتكىنىڭ زاڭسىز تاسىمالدانۋى ىقتيمال باعىتتاردا تەكسەرۋ جۇمىستارىن جۇرگىزىپ كەلەدى.
ءىىم دەرەگىنشە، قىزمەتتىك يتتەردىڭ كومەگىمەن 90 ەسىرتكى قىلمىسى انىقتالىپ، زاڭسىز اينالىمعا تۇسەتىن ەسىرتكى زاتتارىنىڭ جولى كەسىلگەن.
