مەملەكەتتىك رامىزدەر كۇنىنە وراي ۇلىتاۋ وبلىسىندا «رامىزدەر رۋحى – كونستيتۋتسيا كۇشى!» اتتى سالتاناتتى مەملەكەتتىك تۋ كوتەرۋ ءراسىمى ءوتتى.
ايرىقشا مانگە يە مەرەكەلىك ءىس-شاراعا وبلىس اكىمى، مەملەكەتتىك ورگانداردىڭ باسشىلارى، ءماسليحات دەپۋتاتتارى، قوعام قايراتكەرلەرى، جاستار ۇيىمدارىنىڭ وكىلدەرى، اسكەري قىزمەتشىلەر، ەڭبەك ارداگەرلەرى مەن قالا تۇرعىندارى قاتىستى.
سالتاناتتى ءراسىم بارىسىندا قازاقستان رەسپۋبليكاسىنىڭ مەملەكەتتىك تۋى كوككە كوتەرىلىپ، مەملەكەتتىك ءانۇران اسقاقتاي شىرقالدى. جينالعان قاۋىمدى مەملەكەتتىك رامىزدەر كۇنىمەن قۇتتىقتاعان وبلىس اكىمى داستان رىسپەكوۆ تاۋەلسىز قازاقستاننىڭ باستى نىشاندارى سانالاتىن مەملەكەتتىك تۋ، ەلتاڭبا جانە ءانۇراننىڭ ەل بىرلىگى مەن ۇلتتىق رۋحتى نىعايتۋداعى تاريحي ماڭىزىنا ەرەكشە توقتالدى.
«بيىلعى مەرەكەنىڭ تاعىلىمدىق ءمانى تەرەڭ. جالپىۇلتتىق رەفەرەندۋمدا قابىلدانعان اتا زاڭىمىزدىڭ ماڭىزىن ايشىقتاۋ ماقساتىندا بۇل كۇن «رامىزدەر رۋحى – كونستيتۋتسيا كۇشى» تاقىرىبىمەن ءوتىپ وتىر. مەملەكەتتىك تۋ، ەلتاڭبا جانە ءانۇران – جاي عانا رەسمي بەلگىلەر ەمەس، ولار – تاۋەلسىزدىگىمىزدىڭ تۇعىرى، ەل بىرلىگىنىڭ ايعاعى، زاڭ ۇستەمدىگى مەن ادىلەتتى قوعامنىڭ سيمۆولى»، – دەدى ۇلىتاۋ وبلىسىنىڭ اكىمى داستان رىسپەكوۆ.
مەرەكەلىك شارا اياسىندا قازاقستاندىق ەسترادا جۇلدىزدارى ونەر كورسەتىپ، تۇرعىندارعا كوتەرىڭكى كوڭىل-كۇي سىيلادى. پاتريوتتىق اندەر شىرقالىپ، كوپشىلىككە ارنالعان مازمۇندى مادەني باعدارلاما ۇيىمداستىرىلدى.
