ۇلىتاۋ وبلىسىنىڭ پروكۋراتۋراسى ەلدى مەكەندەردى كوگالداندىرۋعا جانە قورشاعان ورتاعا ۇقىپتى قاراۋ مادەنيەتىن قالىپتاستىرۋعا باعىتتالعان ورىك سۇيەكتەرىن جاپپاي وتىرعىزۋ جونىندەگى ەكولوگيالىق باستامانى قولعا الدى.
باستامانىڭ نەگىزىندە بارشاعا قولجەتىمدى قاراپايىم يدەيا جاتىر: ورىك پەن ورىك قاعىنىڭ سۇيەكتەرىن تاستاماي، جيناپ، وتىرعىزۋ ماتەريالى رەتىندە پايدالانۋ.
ورىك ءارتۇرلى تابيعي جاعدايلارعا جاقسى بەيىمدەلەدى، ال ونى سۇيەكتەن ءوسىرۋ كۇردەلى دايىندىقتى قاجەت ەتپەيدى. كوپشىلىك جۇمىلا قاتىسقان جاعدايدا وسىنداي قاراپايىم ارەكەتتىڭ ءوزى ۋاقىت وتە كەلە ەلەۋلى ەكولوگيالىق ناتيجە بەرەدى.
بۇل باستاما قازاقستان پرەزيدەنتى قاسىم-جومارت توقاەۆتىڭ ۇسىنىسىمەن بۇۇ باس اسسامبلەياسىنىڭ 22 ءساۋىردى حالىقارالىق پلانەتانى كوگالداندىرۋ كۇنى دەپ جاريالاۋ تۋرالى شەشىمى اياسىندا ەرەكشە ماڭىزعا يە.
ۇلىتاۋ وبلىسىندا بۇل يدەيا ءىس جۇزىندە جۇزەگە اسىرىلا باستادى. باستاماعا مەكتەپ وقۋشىلارى مەن مەملەكەتتىك ورگاندار قوسىلىپ، ءوڭىر اۋماعىندا سۇيەكتەردى جيناۋ جانە وتىرعىزۋ جۇمىستارى جۇرگىزىلۋدە.
وسكەلەڭ ۇرپاقتى تارتۋعا ەرەكشە نازار اۋدارىلدى. بالالاردىڭ كوشەت وتىرعىزۋعا قاتىسۋى كوگالداندىرۋعا ناقتى ۇلەس قوسىپ قانا قويماي، ولاردىڭ بويىندا جاستايىنان تابيعاتقا ۇقىپتى قاراۋ مادەنيەتى مەن قورشاعان ورتانىڭ جاي-كۇيىنە دەگەن جەكە جاۋاپكەرشىلىكتى قالىپتاستىرۋعا مۇمكىندىك بەرەدى.
باستامانىڭ باستى ەرەكشەلىگى – ونىڭ قولجەتىمدىلىگىندە. قاتىسۋ ءۇشىن ارنايى جابدىق پەن قوماقتى قاراجات قاجەت ەمەس: سۇيەكتى ساقتاپ، ونىڭ اعاشقا اينالۋىنا مۇمكىندىك بەرۋ جەتكىلىكتى.
ەگەر وسى قاراپايىم باستامانى مىڭداعان ادام قولداسا، بۇگىن وتىرعىزىلعان سۇيەكتەر كەلەشەكتە مىڭداعان اعاشقا اينالىپ، قالالار مەن اۋىلداردىڭ جاسىل جەلەككە بولەنۋىنە ءارى پايدالى ەكولوگيالىق ادەتتىڭ قالىپتاسۋىنا ىقپال ەتەدى.
سۇيەكتى تاستاما — تابيعاتقا مۇمكىندىك بەر!
