ەۆەرەستتى باعىندىرعان العاشقى اۋعان ايەلى، اۆستراليادا تۇراتىن بوسقىن زاكيا احماد شىڭدى باعىندىرعاننان كەيىن اۋعانستانداعى ايەلدەر مەن قىزداردىڭ جاعدايىنا قوعام نازارىن اۋدارۋ جانە قاراجات جيناۋ جۇمىستارىن كۇشەيتتى، دەپ حابارلايدى «ادىرنا» ءتىلشىسى fergana.news-كە سىلتەمە جاساپ.
ول الەم جۇرتشىلىعىن تالىپتەر بيلىككە قايتا كەلگەننەن بەرى بەس جىلعا جۋىق ۋاقىت بويى ورتا جانە جوعارى ءبىلىم الۋعا تىيىم سالىنعان اۋعان ايەلدەرى مەن قىزدارىن قولداۋعا شاقىرۋدا.
Amu TV ارناسىنىڭ حابارلاۋىنشا، زاكيا احماد حالىقارالىق قاۋىمداستىقتى «سىرتتان باقىلاپ وتىرماۋعا» جانە قۇقىقتارى جۇيەلى تۇردە بۇزىلىپ جاتقان اۋعان ايەلدەرىنىڭ ءۇنى بولۋعا ۇندەگەن. سونداي-اق گەرمانيانى قوسا العاندا، ەۋروپاداعى اۋعان بەلسەندىلەرى مەن دياسپورا وكىلدەرى اۋعانستاندا قىزدارعا ارنالعان مەكتەپتەر مەن جوعارى وقۋ ورىندارىن قايتا اشۋدى تالاپ ەتىپ جاتقانىن اتاپ وتكەن.
زاكيا احماد جاس كەزىندە تالىپتەردىڭ شابۋىلىنان امان قالىپ، كەيىن بوسقىن مارتەبەسىن العان.
احمادتىڭ ايتۋىنشا، ونىڭ ماقساتى – جەكە جەتىستىك ارقىلى اۋعان ايەلدەرى مەن قىزدارىن جىگەرلەندىرىپ قانا قويماي، ناقتى وزگەرىستەرگە قول جەتكىزۋ ءۇشىن رەسۋرستار مەن حالىقارالىق نازاردى جۇمىلدىرۋ. ول ايەلدەر قۇقىقتارى ماسەلەسىن بوسقىندىق تاجىريبەسىمەن جانە پسيحيكالىق دەنساۋلىق تاقىرىبىمەن بايلانىستىرىپ، بىلىمنەن ايىرۋ، سوعىس جانە ءماجبۇرلى كوشى-قون اۋعان ايەلدەرىنىڭ تۇتاس بۋىنىنا اۋىر پسيحولوگيالىق زارداپ كەلتىرگەنىن اتاپ ءوتتى.
ەسكە سالايىق، الپينيست الەمدەگى ەڭ بيىك شىڭعا 21 مامىر كۇنى تاڭەرتەڭ كوتەرىلگەن. احماد بۇعان دەيىن فرانتسياداعى مونبلان، ۇندىستانداعى ناندادەۆي شىڭدارىن جانە اۋعانستاننىڭ تەڭىز دەڭگەيىنەن 7402 مەتر بيىكتىكتەگى ەڭ بيىك شىڭى ناۋشاحتى دا باعىندىرعان.
Rukhshana Media جانە Gowharshad Media مالىمەتىنشە، ول بۇل ەكسپەديتسيانى اۋعان قىزدارىنىڭ ءبىلىم الۋ قۇقىعى مەن ايەلدەر قۇقىقتارىن قورعاۋعا باعىتتالعان ۇزاقمەرزىمدى ناۋقاننىڭ ءبىر بولىگى رەتىندە جوسپارلاعان. احماد 2025 جىلدان باستاپ ارنايى دايىندىق جۇرگىزىپ، GoFundMe پلاتفورماسىندا قاراجات جيناۋ ناۋقانىن باستاعان. ول ەۆەرەستكە «ايەلدەردىڭ بوستاندىعى، ءبىلىم الۋ قۇقىعى جانە پسيحيكالىق دەنساۋلىق ءۇشىن»، سونداي-اق «تالىپتەر بيلىگى كەزىندە مەكتەپكە بارۋ مۇمكىندىگىنەن ايىرىلعان اۋعانستان قىزدارىنىڭ اتىنان» كوتەرىلىپ جاتقانىن مالىمدەگەن.
