الماتىدا سوڭعى قوڭىراۋ قارساڭىندا قالا مەكتەپتەرىنىڭ ءبىرىنىڭ تۇلەكتەرى قاتىسقان اۆتوكورتەجدەردى ۇيىمداستىرۋ ارەكەتى توقتاتىلدى. بۇل تۋرالى قالالىق پوليتسيا دەپارتامەنتى ايتتى، دەپ حابارلايدى «ادىرنا» ءتىلشىسى.
قۇقىق قورعاۋ ورگاندارىنىڭ ەسكەرتۋلەرىنە قاراماستان، ءبىر توپ ءجاسوسپىرىم قالا كوشەلەرىمەن كولوننا بولىپ ءجۇرىپ، جول قوزعالىسى ەرەجەلەرىن بۇزعان. سونىڭ سالدارىنان 21 تۇلەكتىڭ اتا-اناسى بالالاردى تاربيەلەۋ مىندەتىن تيىسىنشە ورىنداماعانى ءۇشىن جاۋاپقا تارتىلدى. اتالعان باپ بويىنشا 10 اەك (43 250 تەڭگە – رەد.) كولەمىندە ايىپپۇل قاراستىرىلعان.
سونداي-اق پوليتسيا كولىك قۇرالدارىن پايدالانۋ ەرەجەلەرىن بۇزعانى ءۇشىن 5 اكىمشىلىك حاتتاما تولتىردى. كولىكتەر ايىپتۇراققا قويىلدى.
«پوليتسيا اۆتوكورتەجدەرگە، اسىرەسە كامەلەتكە تولماعانداردىڭ قاتىسۋىمەن وتەتىن شارالارعا جول بەرىلمەيتىنىن الدىن الا ەسكەرتكەن بولاتىن. سوعان قاراماستان كەيبىر ازاماتتار زاڭ تالاپتارىن ەلەمەدى. وسىنداي ءاربىر دەرەك بويىنشا پوليتسيا قاتاڭ تۇردە ارەكەت ەتەدى. مەرەكەلىك كوڭىل كۇي قوعامدىق ءتارتىپتى بۇزۋعا جانە اينالاداعى ادامداردىڭ قاۋىپسىزدىگىنە قاتەر توندىرۋگە سەبەپ بولماۋى ءتيىس»، – دەدى اكىمشىلىك پوليتسيا باسقارماسىنىڭ باستىعى ءابدىنۇر تاسباەۆ.
سوڭعى قوڭىراۋ كۇنى جانە ودان كەيىنگى كەزەڭدە پوليتسيا قوعامدىق ءتارتىپ پەن جول قوزعالىسى ەرەجەلەرىنىڭ ساقتالۋىن كۇشەيتىلگەن تۇردە باقىلايدى. تۇلەكتەردىڭ قاتىسۋىمەن بولاتىن قۇقىق بۇزۋشىلىقتاردىڭ الدىن الۋعا ەرەكشە نازار اۋدارىلادى.
