فوتو: ءىىم
الماتىدا ءدىني ەكسترەميزمدى ناسيحاتتاپ، دىنارالىق ارازدىقتى قوزدىردى دەگەن كۇدىكپەن 44 جاستاعى ەر ادام ۇستالدى، دەپ حابارلايدى “ادىرنا”.
بۇل تۋرالى ىشكى ىستەر مينيسترلىگىنىڭ ءباسپاسوز قىزمەتى حابارلادى.
تەرگەۋ دەرەگىنشە، كۇدىكتى 2024 جىلدان بەرى قازاقستاننان تىس جەردە ءجۇرىپ، راديكالدى يدەيالاردى تاراتۋدى جالعاستىرعان. ول جابىق Telegram توپتارىن اكىمشىلەندىرىپ، ونلاين دارىستەر وتكىزگەن جانە ءوز جاقتاستارىنا يدەولوگيالىق ىقپال ەتكەن.
بۇعان دەيىن ونىڭ بىرقاتار ءاۋديودارىسى سوت شەشىمىمەن تەرروريزمدى ناسيحاتتاۋ جانە ءدىني ارازدىقتى قوزدىرۋ بەلگىلەرى بار ەكسترەميستىك ماتەريالدار دەپ تانىلعان.
ءىىم مالىمەتىنشە، كۇدىكتى شەتەلدەگى تەولوگيالىق وقۋ ورىندارىندا ءدىني ءبىلىم العان. سونداي-اق 2024–2025 جىلدارى ءوزىنىڭ جاقتاستارى اراسىنداعى بەدەلىن پايدالانىپ، ولاردان 60 ميلليون تەڭگەدەن استام قاراجات العان.
11 قاراشادا جۇرگىزىلگەن جەدەل-ىزدەستىرۋ ءىس-شارالارى ناتيجەسىندە ەر ادام الماتىدا ۇستالدى. سونىمەن قاتار الماتى قالاسى مەن جامبىل وبلىسىندا تەرگەۋ ارەكەتتەرى جۇرگىزىلدى. ءتىنتۋ بارىسىندا ءدىني ادەبيەتتەر مەن ەكسترەميستىك يدەولوگيا بەلگىلەرى بار قولجازبالار تاركىلەنگەن.
قازىر كۇدىكتى ۋاقىتشا ۇستاۋ يزولياتورىنا قامالدى. پوليتسيا قىزمەتكەرلەرى ءىستىڭ ءمان-جايىن انىقتاپ، ىقتيمال سىبايلاستارىن ىزدەستىرىپ جاتىر.
