جالعان اقپارات تاراتتى دەگەن كۇدىكپەن ۇيقاماعىنا الىنعان ءتىلشى بوتاگوز وماروۆاعا قاتىستى قىلمىستىق ءىس توقتاتىلدى. ول «ۆد ستروي-ينجينيرينگ» جشس مەن ونىڭ ديرەكتورى ازامات وسىمبەكوۆتىڭ قىزمەتىنە قاتىستى تاراتقان مالىمەتتەرىن تەرىسكە شىعارۋ حاتىن جاريالاپ، كەشىرىم سۇرادى، دەپ حابارلايدى “ادىرنا”.
جۋرناليست اقپاراتتىق-تەرىسكە شىعارۋ مالىمدەمەسىن 22 مامىر كۇنى جەلىدەگى پاراقشالارىندا جاريالادى.
«مەن، وماروۆا بوتاگوز كوشكىنبايقىزى، كاسىبي جۋرناليست، قازاقستان جۋرناليستەر وداعىنىڭ مۇشەسى رەتىندە، وسى حات ارقىلى «ۆد ستروي-ينجينيرينگ» جشس مەن ونىڭ ديرەكتورى ازامات ۇسىمبەكوۆتىڭ قىزمەتىنە قاتىستى ءوزىم تاراتقان مالىمەتتەردى رەسمي تۇردە تەرىسكە شىعارامىن»، – دەپ جازدى بوتاگوز وماروۆا.
ول بۇعان دەيىن استاناداعى ات سپورتى كەشەنىنىڭ قۇرىلىسى كەزىندە كومپانيانىڭ مەردىگەرلەر الدىنداعى قارىزى تۋرالى شىندىققا سايكەس كەلمەيتىن اقپارات تاراتقانىن ايتىپ، كومپانيا وكىلدەرى مەن قۇرىلتايشىلارىنان، سونداي-اق ءوز وقىرماندارىنان كەشىرىم سۇرادى.
اقپاراتتى استانا پوليتسيا دەپارتامەنتى راستادى.
پوليتسيا مالىمەتىنشە، بوتاگوز وماروۆا ۇيقاماقتان بوساتىلعان.
"استانا پوليتسيا دەپارتامەنتى ب. وماروۆاعا قاتىستى قىلمىستىق ءىستى تاراپتاردىڭ تاتۋلاسۋىنا بايلانىستى اقتالمايتىن نەگىزدەر بويىنشا توقتاتتى. بۇلتارتپاۋ شاراسىنىڭ كۇشى جويىلدى. پروتسەسسۋالدىق شەشىمدى پروكۋرور بەكىتتى", - دەپ تۇسىنىكتەمە بەردى استانا پوليتسيا دەپارتامەنتى.
ەسكە سالساق، جۋرناليست بوتاگوز وماروۆا 20 ناۋرىز كۇنى «كورىنەۋ جالعان اقپارات تاراتۋ» بابى بويىنشا جۇرگىزىلىپ جاتقان سوتقا دەيىنگى تەرگەپ-تەكسەرۋ اياسىندا جاۋاپ بەرۋ ءۇشىن پوليتسياعا شاقىرىلعان. الايدا ونىڭ پروتسەسسۋالدىق مارتەبەسى «كۇدىكتى» دەپ اۋىستىرىلىپ، 21 ناۋرىزعا قاراعان ءتۇنى سوت شەشىمىمەن ەكى ايعا ۇيقاماققا الىندى. كەيىن ءجۋرناليستىڭ «ۆد ستروي-ينجينيرينگ» جشس تۋرالى جاريالاعان ماتەريالدارى ءۇشىن تەرگەۋگە الىنعانى ءمالىم بولدى.
13 مامىر كۇنى ىشكى ىستەر ۆيتسە-ءمينيسترى سانجار ءادىلوۆ وماروۆاعا قاتىستى تەرگەۋ اياقتالعانىن جانە جاقىن ارادا ءىس سوتقا جولداناتىنىن حابارلاعان بولاتىن.
