Jalǧan aqparat taratty degen küdıkpen üiqamaǧyna alynǧan tılşı Botagöz Omarovaǧa qatysty qylmystyq ıs toqtatyldy. Ol «VD Stroi-İnjiniring» JŞS men onyŋ direktory Azamat Ösımbekovtıŋ qyzmetıne qatysty taratqan mälımetterın terıske şyǧaru hatyn jariialap, keşırım sūrady, dep habarlaidy “Adyrna”.
Jurnalist aqparattyq-terıske şyǧaru mälımdemesın 22 mamyr künı jelıdegı paraqşalarynda jariialady.
«Men, Omarova Botagöz Köşkınbaiqyzy, käsıbi jurnalist, Qazaqstan Jurnalister odaǧynyŋ müşesı retınde, osy hat arqyly «VD Stroi-İnjiniring» JŞS men onyŋ direktory Azamat Üsımbekovtıŋ qyzmetıne qatysty özım taratqan mälımetterdı resmi türde terıske şyǧaramyn», – dep jazdy Botagöz Omarova.
Ol būǧan deiın Astanadaǧy at sporty keşenınıŋ qūrylysy kezınde kompaniianyŋ merdıgerler aldyndaǧy qaryzy turaly şyndyqqa säikes kelmeitın aqparat taratqanyn aityp, kompaniia ökılderı men qūryltaişylarynan, sondai-aq öz oqyrmandarynan keşırım sūrady.
Aqparatty Astana Polisiia departamentı rastady.
Polisiia mälımetınşe, Botagöz Omarova üiqamaqtan bosatylǧan.
"Astana Polisiia departamentı B. Omarovaǧa qatysty qylmystyq ıstı taraptardyŋ tatulasuyna bailanysty aqtalmaityn negızder boiynşa toqtatty. Būltartpau şarasynyŋ küşı joiyldy. Prosessualdyq şeşımdı prokuror bekıttı", - dep tüsınıkteme berdı Astana Polisiia departamentı.
Eske salsaq, jurnalist Botagöz Omarova 20 nauryz künı «körıneu jalǧan aqparat taratu» baby boiynşa jürgızılıp jatqan sotqa deiıngı tergep-tekseru aiasynda jauap beru üşın polisiiaǧa şaqyrylǧan. Alaida onyŋ prosessualdyq märtebesı «küdıktı» dep auystyrylyp, 21 nauryzǧa qaraǧan tünı sot şeşımımen ekı aiǧa üiqamaqqa alyndy. Keiın jurnalistıŋ «VD Stroi-İnjiniring» JŞS turaly jariialaǧan materialdary üşın tergeuge alynǧany mälım boldy.
13 mamyr künı ışkı ıster vise-ministrı Sanjar Ädılov Omarovaǧa qatysty tergeu aiaqtalǧanyn jäne jaqyn arada ıs sotqa joldanatynyn habarlaǧan bolatyn.
