ارمەنيانىڭ سىبايلاس جەمقورلىققا قارسى سوتى ەلدىڭ بۇرىنعى پرەزيدەنتى سەرج سارگسيانعا قاتىستى بۇلتارتپاس شارا رەتىندە ەلدەن شىقپاۋ تۋرالى قولحات بەردى. سارگسيان اسا ءىرى كولەمدە اقشا جىلىستاتۋ، قىزمەتتىك وكىلەتتىگىن اسىرا پايدالانۋ جانە اسا ءىرى مولشەردە پارا الدى دەگەن كۇدىككە ىلىنگەن ءىس بويىنشا فيگۋرانت بولىپ وتىر. بۇل تۋرالى تاسس اگەنتتىگى جازدى، دەپ حابارلايدى «ادىرنا» ءتىلشىسى.
«ارمەنيا رەسپۋبليكاسىنىڭ ءۇشىنشى پرەزيدەنتى سەرج سارگسيانعا قاتىستى الدىن الۋ شاراسى رەتىندە ەلدەن شىعۋعا تىيىم سالىندى»، – دەلىنگەن حابارلامادا.
سونداي-اق ۆەدومستۆو 25 تامىزدا قىلمىستىق ءىس اياسىندا ۇستالعان التى ادامنىڭ تورتەۋىنە، ونىڭ ىشىندە بۇرىنعى پرەزيدەنت روبەرت كوچارياننىڭ ۇلىنا قاماۋعا الۋ تۇرىندەگى بۇلتارتپاس شارا قولدانىلعانىن حابارلادى. تاعى ءبىر فيگۋرانت ۇيقاماققا جىبەرىلگەن.
ارمەنيانىڭ سىبايلاس جەمقورلىققا قارسى سوتى 26 تامىزعا قاراعان ءتۇنى كوچارياننىڭ ۇلكەن ۇلى سەدراك كوچارياندى ەكى ايعا قاماۋعا الۋ تۋرالى شەشىم قابىلداعان. ادۆوكات الەكساندر كوچۋباەۆتىڭ ايتۋىنشا، سەدراك كوچاريانعا كەلۋشىلەرمەن كەزدەسۋگە شەكتەۋ قويىلىپ، وعان تەك ايەلى مەن بالالارىنىڭ بارۋىنا رۇقسات ەتىلگەن. ول «ەرەۆان-كەنترون» قىلمىستىق-اتقارۋ مەكەمەسىنە جەتكىزىلگەن. بۇل مەكەمە حالىق اراسىندا ارمەنيا ۇلتتىق قاۋىپسىزدىك قىزمەتىنىڭ «جەرتولەلەرى» دەگەن اتاۋمەن بەلگىلى.
روبەرت كوچاريانعا قاتىستى بۇلتارتپاس شارا دارىگەرلەر ونى سوتقا جەتكىزۋگە رۇقسات بەرگەننەن كەيىن تاڭدالادى. بۇدان شامامەن ەكى اپتا بۇرىن كوچاريان جۇرەگىنە وتا جاساتقان. ال 25 تامىزدا ۇستالعاننان كەيىن ونىڭ دەنساۋلىعى كۇرت ناشارلاپ، اۋرۋحاناعا جاتقىزىلعان ەدى.
25 تامىزدا ارمەنيانىڭ باس پروكۋراتۋراسى بۇرىنعى پرەزيدەنت روبەرت كوچاريانعا قاتىستى قىلمىستىق ءىس قوزعالعانىن حابارلاعان بولاتىن. وعان قىزمەتتىك وكىلەتتىگىن اسىرا پايدالانۋ، اسا ءىرى كولەمدە پارا الۋ جانە اقشا جىلىستاتۋ ايىپتارى تاعىلىپ وتىر. بۇل ءىس بويىنشا كوچاريان پرەزيدەنت بولعان كەزەڭدە قورعانىس ءمينيسترى قىزمەتىن اتقارعان سەرج سارگسيان دا فيگۋرانت رەتىندە وتۋدە.
سول كۇنى ارمەنيانىڭ سىبايلاس جەمقورلىققا قارسى كوميتەتى روبەرت كوچاريان مەن ونىڭ وتباسى مۇشەلەرىنە تيەسىلى بىرنەشە ونداعان مەكەنجايدا ءتىنتۋ جانە باسقا دا تەرگەۋ ارەكەتتەرى جۇرگىزىلگەنىن حابارلاعان.
