فوتو: قازاق ادەبيەتى
90 جاسقا تولعان قازاقستاننىڭ حالىق جازۋشىسى، اقىن ولجاس سۇلەيمەنوۆءتىڭ مەرەيتويى ەل كولەمىندە اتالىپ ءوتىپ جاتىر. اقىننىڭ جاستىق شاعىندا قۋدالاۋعا ۇشىراۋ قاۋپى بولعانى تۋرالى قازاقستان جازۋشىلار وداعىنىڭ توراعاسى مەرەكە قۇلكەنوۆ مالىمدەدى، دەپ حابارلايدى "ادىرنا" ۇلتتىق پورتالى 24.kz سايتىنا سىلتەپ.
ونىڭ ايتۋىنشا، 1975 جىلى جارىق كورگەن «از ي يا» كىتابى قوعامدا ۇلكەن رەزونانس تۋدىرعان. ەڭبەك تۇركولوگتار مەن لينگۆيستەردىڭ جوعارى باعاسىنا يە بولعانىمەن، كەيىن سىنعا ۇشىراپ، كىتاپتىڭ ءجۇز مىڭ داناسى اينالىمنان الىنعان.
الايدا ولجاس سۇلەيمەنوۆتى جازادان جانە قاستاندىقتان قورعاپ قالعان دىنمۇحامەد قوناەۆ بولعان.
«1975 جىلى “از ي يا” كىتابى جارىق كورىپ، بۇكىل الەمدى شۋلاتتى. كىتاپتىڭ ون بەتىن وقىعان سوڭ-اق الەمنىڭ عالىمدارى، تۇركولوگتارى مەن لينگۆيستەرى تاڭدانىسىن جاسىرا المادى. كەيىن ۇرەيلەنىپ، “مىنا ولجاستى توقتاتۋ كەرەك” دەگەن اڭگىمەلەر ايتىلا باستادى. ءجۇز مىڭ دانامەن شىققان كىتاپ ءبىر كۇندە جويىلىپ، اينالىمنان الىندى»، – دەدى قازاقستان جازۋشىلار وداعىنىڭ توراعاسى مەرەكە قۇلكەنوۆ.
بۇگىندە 90 جاسقا تولعان، ابىز اقساقال اتانعان ولجاس سۇلەيمەنوۆ – ەلگە سىڭىرگەن ەڭبەگى زور، حالىق قۇرمەتىنە بولەنگەن تۇلعا. ونىڭ تەرەڭ ويلى، وتكىر شىعارمالارى قازاق ادەبيەتىندە ەرەكشە ورىن الادى. اقىن ءوز ولەڭدەرى ارقىلى قازاق ەلىن بۇكىل وداققا، الەمگە تانىتتى. التىن جالدى ارعىماققا، كۇمىس قاناتتى اقسۇڭقارعا تەڭەلگەن اردا ازاماتتىڭ مەرەيتويى بۇگىندە ەل كولەمىندە اتالىپ ءوتىپ جاتىر.
«سوندا جاسى قىرىقتان ەندى اسقان اقىنعا ءبىر عانا ادام اراشا ءتۇستى. ول – دىنمۇحامەد قوناەۆ. وداقتىڭ پىسىقتارى “ولجاس سۇلەيمەنوۆتى قۇرتۋ كەرەك” دەپ شۋلاعان كەزدە، برەجنەۆكە ءمان-جايدى ءتۇسىندىرىپ، ولجاستى امان الىپ قالعان – قوناەۆ. ال كەيىن دىنمۇحامەد قوناەۆتىڭ باسىنا قيىن كۇن تۋىپ، پلەنۋمدا جۇرت جارىسا ءسوز سويلەپ، كوبى ودان تەرىس اينالعاندا، جانىنان تابىلعان دا – ولجاس سۇلەيمەنوۆ ەدى. ول جالعىز قالعان قوناەۆتىڭ قاسىنا بارىپ وتىردى. سول كەزەڭدە بۇكىل الەم ولجاستى تاني باستادى. ول الەمگە “ارعىماق”، “جىگىت”، “اينالايىن” سەكىلدى قازاقى ۇعىمداردى تانىتىپ، جىلى سەزىم ۇيالاتتى»، – دەدى وداق توراعاسى.
ولجاس سۇلەيمەنوۆ: "قازاقتىڭ 70 پايىزىن اشتىقپەن قىردى، قالعان 30 پايىزىن ۋحان ۆيرۋسىمەن قىرماق پا؟!"
