بىشكەكتە ولجاس سۇلەيمەنوۆكە نوبەل سىيلىعىن بەرۋ باستاماسى قوزعالدى، دەپ حابارلايدى "ادىرنا" ۇلتتىق پورتالى.
باستاما اقىننىڭ 90 جىلدىعىنا ارنالعان حالىقارالىق دوڭگەلەك ۇستەل بارىسىندا ايتىلعان.
بۇل تۋرالى شىڭعىس ايتماتوۆ اتىنداعى حالىقارالىق ىستىقكول فورۋمى پرەزيدەنتى اسقار ايتماتوۆ مالىمدەدى. ونىڭ ايتۋىنشا، باستاما قىرعىزستاندىق عالىم زاينيدين قۇرمانوۆ تاراپىنان ۇسىنىلعان.
"ولجاس سۇلەيمەنوۆتىڭ كانديداتۋراسىن نوبەل سىيلىعىنا ۇسىنۋ تۋرالى ءسوز بولىپ وتىر", – دەدى اسقار ايتماتوۆ.
دوڭگەلەك ۇستەلگە قاتىسۋشىلار اقىننىڭ ادەبيەتكە، تۇركى مادەنيەتىنە جانە جاھاندىق انتيادرولىق قوزعالىسقا قوسقان ۇلەسىن ەرەكشە اتاپ ءوتتى. ولار سۇلەيمەنوۆتى الەمدىك دەڭگەيدەگى تۇلعا ءارى قازاق زيالىلارىنىڭ ەڭ تانىمال وكىلدەرىنىڭ ءبىرى رەتىندە باعالادى.
كەزدەسۋ بارىسىندا "نەۆادا – سەمەي" قوزعالىسىنىڭ تاريحي رولىنە دە نازار اۋدارىلدى. قاتىسۋشىلار بۇل باستاما سەمەي يادرولىق پوليگونىن جابۋعا ىقپال ەتىپ، يادرولىق قارۋسىز الەم جولىنداعى كۇرەستىڭ سيمۆولىنا اينالعانىن ايتتى. سونداي-اق سپيكەرلەر "از ي يا" ەڭبەگىنىڭ كەڭەستىك كەزەڭدەگى مادەني-تاريحي ماڭىزىن ەسكە الدى.
ءىس-شارا بارىسىندا ولجاس سۇلەيمەنوۆ ونلاين فورماتتا ءسوز سويلەپ، قاتىسۋشىلارعا العىس ءبىلدىردى جانە بارشاعا بەيبىتشىلىك پەن اماندىق تىلەدى. كونفەرەنتسياعا قازاقستان مەن قىرعىزستاننىڭ ديپلوماتتارى، عالىمدارى، قوعام قايراتكەرلەرى جانە مادەني ۇيىم وكىلدەرى قاتىستى.
ايتا كەتەيىك، 2025 جىلى ولجاس سۇلەيمەنوۆتى نوبەل سىيلىعىنا ۇسىنۋ تۋرالى «بايتاق» جاسىلدار پارتياسىنىڭ ەسەپتىك كونفەرەنتسياسىندا جاريالانعان ەدى.
