فوتو: پاۆلودار وبلىستىق فيلارمونياسى
نورۆەگيادا وتكەن اۋكتسيوننان قازاقتىڭ بەلگىلى كۇيشىسى رۇستەمبەك وماروۆتىڭ ەكىنشى دۇنيەجۇزىلىك سوعىس كەزىندەگى سۋرەتى تابىلدى. تاريحي فوتودا مۋزىكانت نەمىس تۇتقىنىندا وتىرعان كەزدە قولدان جاساعان دومبىراسىن ۇستاپ تۇر. كەيىن جادىگەردى پاۆلودار وبلىستىق فيلارمونياسى ساتىپ الدى، دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەپ.
بۇل ولجا 2024 جىلى پاۆلودارلىق «پانفيلوۆشىلار» ىزدەۋ جاساعى مەن نورۆەگيالىق زەرتتەۋشىلەر باستاعان جۇمىستىڭ ناتيجەسىندە انىقتالعان. ماماندار مۋزىكانتتىڭ سوعىس جىلدارىنداعى ومىرىنە قاتىستى بۇرىن بەلگىسىز دەرەكتەردى جيناعان.
زەرتتەۋشىلەردىڭ مالىمەتىنشە، رۇستەمبەك وماروۆ نورۆەگياداعى شتالاگ 322 اسكەري تۇتقىندار لاگەرىندە بولعان. تۇتقىندا جۇرسە دە، ول مۋزىكادان قول ۇزبەي، فانەرا، اعاش جانە قارماق جىبىنەن دومبىرا جاساپ، باسقا تۇتقىندارعا كۇي ورىنداعان. بىردە ونىڭ موتسارت شىعارماسىن ورىنداعانىن ەستىگەن نەمىس وفيتسەرى مۋزىكانتقا كومەكتەسىپ، ازىق-تۇلىك بەرىپ تۇرعان. وماروۆ وزىنە بەرىلگەن تاماقتى باسقا تۇتقىندارمەن بولىسكەن.
سۋرەتتى نورۆەگيالىق زەرتتەۋشى تاتيانا تورەسەن تاپقان. ول بۇعان دەيىن پاۆلودارلىقتاردىڭ مۋزىكانت تۋرالى دەرەكتى ءفيلمىن كورگەن. كەيىن اۋكتسيوننان كەڭەستىك اسكەري تۇتقىنداردىڭ فوتوسۋرەتتەرىن بايقاپ، سۋرەتتەگى ادامدى تانىعان. نورۆەگيالىق تاريحشى ەيۆين كوسنەس فوتولاردىڭ شتالاگ 322 لاگەرىندە تۇسىرىلگەنىن راستاعان.
26 قازاندا وتكەن اۋكتسيوندا جەتى فوتوسۋرەتتىڭ تورتەۋى ساتىپ الىنعان. ولاردىڭ اراسىندا رۇستەمبەك وماروۆ بەينەلەنگەن سۋرەت تە بار. كەيىن ونى پاۆلودار وبلىستىق فيلارمونياسى يەلەندى. جادىگەردىڭ ناقتى قانشا سوماعا ساتىپ الىنعانى جاريالانبادى. جاقىن ۋاقىتتا نورۆەگيالىق زەرتتەۋشىلەر فوتوسۋرەتتىڭ تۇپنۇسقاسىن فيلارمونياعا تابىستاماق.
رۇستەمبەك وماروۆتىڭ قىزى قارلىعاش وماروۆا دا سۋرەتتەگى ادامدى اكەسىنە ۇقساتقان. فيلارمونيا وكىلدەرى فوتودا مۋزىكانتتىڭ بەينەلەنگەنىن راستاعانىمەن، ونىڭ ناقتى قاي جەردە تۇسىرىلگەنىن انىقتاي الماعان.
رۇستەمبەك وماروۆ – قازاق كسر-ءىنىڭ حالىق ءارتىسى، كۇيشى، كومپوزيتور جانە ديريجەر. ول 1919 جىلى پاۆلودار وڭىرىندە دۇنيەگە كەلگەن. سوعىستا جارالانىپ، نورۆەگيادا نەمىس تۇتقىنىنا تۇسكەن. 1945 جىلعى مۇراعات قۇجاتتارى ونىڭ ازات ەتىلگەن كەڭەستىك اسكەري تۇتقىندار قاتارىندا بولعانىن كورسەتەدى.
ەلگە ورالعان سوڭ قۇرمانعازى اتىنداعى وركەستردە ونەر كورسەتىپ، الماتى كونسەرۆاتورياسىن بىتىرگەن. كەيىن ۇستازدىق قىزمەت اتقارىپ، قازاقتىڭ كۇي ونەرىن دامىتۋعا ۇلەس قوستى. ونىڭ «جاستىق شاق» كۇيى كوپتەگەن وركەستردىڭ رەپەرتۋارىنا ەنگەن. رۇستەمبەك وماروۆ 1988 جىلى دۇنيەدەن ءوتتى.
ايتا كەتەيىك، بيىل قاڭتاردا نورۆەگيالىق ىزدەۋشىلەر ەكىنشى دۇنيەجۇزىلىك سوعىس كەزىندە نورۆەگيانىڭ سولتۇستىگىندەگى ناتسيستىك لاگەرلەردە قازا تاپقان قازاقستاندىق 15 ساربازدىڭ جەرلەنگەن ورىندارىن انىقتاعان بولاتىن.
