قازاقستاندا حانتاۆيرۋس ينفەكتسياسىنىڭ تارالۋ قاۋپى تومەن ەكەنى ايتىلدى، دەپ حابارلايدى "ادىرنا" ۇلتتىق پورتالى.
بۇل تۋرالى قر دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتى مالىمدەگەن.
قازاقپاراتتىڭ مالىمەتىنشە، ماماندار حانتاۆيرۋس نەگىزىنەن كەمىرگىشتەر ارقىلى تارالاتىنىن اتاپ وتكەن. ادام ينفەكتسيانى تىشقاندار مەن ەگەۋقۇيرىقتاردىڭ ءناجىسى، ءزارى نەمەسە سىلەكەيى ارقىلى لاستانعان شاڭ-توزاڭدى تىنىس الۋ كەزىندە جۇقتىرۋى مۇمكىن.
قر دسم سانيتارلىق-ەپيدەميولوگيالىق باقىلاۋ كوميتەتى باسقارماسىنىڭ باسشىسى البينا وتەمۇراتوۆا قازاقستاندا حانتاۆيرۋس تىركەلمەگەنىن ايتتى.
"حانتاۆيرۋس ادامنان ادامعا وڭاي تارالاتىن ينفەكتسيالارعا جاتپايدى. وڭتۇستىك امەريكاداعى كەيبىر شتامدارعا قاتىستى سيرەك جاعدايلار بولعانىمەن، كوپ جاعدايدا ينفەكتسيانىڭ نەگىزگى كوزى – كەمىرگىشتەر", – دەدى مامان.
ونىڭ ايتۋىنشا، اۋرۋدىڭ ينكۋباتسيالىق كەزەڭى 7 كۇننەن 42 كۇنگە دەيىن سوزىلۋى مۇمكىن. العاشقى بەلگىلەرى قاتارىندا دەنە قىزۋىنىڭ كوتەرىلۋى، السىزدىك، بۇلشىقەت اۋرۋى، جوتەل، ەنتىگۋ، جۇرەك اينۋ جانە ءىش ءوتۋ بايقالادى. اۋىر جاعدايدا وكپەنىڭ ءىسىنۋى مەن تىنىس جەتىسپەۋشىلىگى دامۋى ىقتيمال.
ددۇ مەن ساراپشىلار حانتاۆيرۋستىڭ COVID-19 سەكىلدى جاھاندىق پاندەمياعا اينالۋ قاۋپىن تومەن دەپ باعالاپ وتىر. سەبەبى ۆيرۋس اۋا-تامشى جولىمەن تەز تارالمايدى جانە جۇقپالىلىعى الدەقايدا تومەن.
ماماندار حالىققا قاراپايىم ساقتىق شارالارىن ۇستانۋعا كەڭەس بەرەدى. اتاپ ايتقاندا، ءۇي-جايدى تازا ۇستاۋ، كەمىرگىشتەردەن قورعاۋ، تاعامدى جابىق ساقتاۋ، تازالاۋ كەزىندە ماسكا مەن قولعاپ پايدالانۋ جانە قولدى ءجيى جۋ قاجەت.
قازىرگى تاڭدا حانتاۆيرۋسقا قارسى ارنايى ۆاكتسينا مەن ليتسەنزيالانعان ۆيرۋسقا قارسى ەم جوق. ەمدەۋ ناۋقاستىڭ جاعدايىن باقىلاۋعا جانە اسقىنۋلاردىڭ الدىن الۋعا باعىتتالادى.
