ساراتوۆتاعى درون شابۋىلىنان كەيىن مۇناي وڭدەۋ زاۋىتى ورتەندى، دەپ حابارلايدى “ادىرنا” ۇلتتىق پورتالى ArbatMedia-عا سىلتەپ.
وقيعا 11 اقپانعا قاراعان ءتۇنى بولعان. كۋاگەرلەردىڭ ايتۋىنشا، زاۋىت اۋماعىندا ءورت شىققان. دەگەنمەن بۇل اقپارات رەسمي تۇردە راستالماعان.
ساراتوۆ مۇناي وڭدەۋ زاۋىتى – رەسەيدەگى ەڭ كونە كاسىپورىنداردىڭ ءبىرى، بۇرىن «كرەكينگ» زاۋىتى رەتىندە بەلگىلى بولعان. قازىرگى ۋاقىتتا ول «روسنەفت» كومپانياسىنىڭ قۇرامىنا كىرەدى.
وبلىس گۋبەرناتورى درون شابۋىلىنىڭ قالاداعى وندىرىستىك نىسانعا زاقىم كەلتىرگەنىن راستادى. بىراق ناقتى قاي كاسىپورىنعا زيان تيگەنى جايلى مالىمەت بەرمەدى. ونىڭ ايتۋىنشا، اۋە شابۋىلىنا قارسى قورعانىس كۇشتەرى درونداردى جويعان، ال ولاردىڭ قالدىقتارى تۇسكەن جەرلەردە توتەنشە قىزمەتتەر جۇمىس ىستەپ جاتىر.
قازىرگى ۋاقىتتا قازا تاپقاندار مەن زارداپ شەككەندەر تۋرالى اقپارات جوق.
ساراتوۆ - قازاقستاننىڭ باتىس بولىگىمەن شەكارالاس اۋماق.
ەسكە سالا كەتەيىك، 3 اقپانعا قاراعان ءتۇنى رەسەيدىڭ استراحان جانە ۆولگوگراد وبلىستارىنا درونمەن شابۋىل جاسالعان ەدى.
