Qazaqstanda hantavirus infeksiiasynyŋ taralu qaupı tömen ekenı aityldy, dep habarlaidy "Adyrna" ūlttyq portaly.
Būl turaly QR Densaulyq saqtau ministrlıgı Sanitarlyq-epidemiologiialyq baqylau komitetı mälımdegen.
Qazaqparattyŋ mälımetınşe, mamandar hantavirus negızınen kemırgışter arqyly taralatynyn atap ötken. Adam infeksiiany tyşqandar men egeuqūiryqtardyŋ näjısı, zärı nemese sılekeiı arqyly lastanǧan şaŋ-tozaŋdy tynys alu kezınde jūqtyruy mümkın.
QR DSM Sanitarlyq-epidemiologiialyq baqylau komitetı basqarmasynyŋ basşysy Albina Ötemūratova Qazaqstanda hantavirus tırkelmegenın aitty.
"Hantavirus adamnan adamǧa oŋai taralatyn infeksiialarǧa jatpaidy. Oŋtüstık Amerikadaǧy keibır ştamdarǧa qatysty sirek jaǧdailar bolǧanymen, köp jaǧdaida infeksiianyŋ negızgı közı – kemırgışter", – dedı maman.
Onyŋ aituynşa, aurudyŋ inkubasiialyq kezeŋı 7 künnen 42 künge deiın sozyluy mümkın. Alǧaşqy belgılerı qatarynda dene qyzuynyŋ köterıluı, älsızdık, būlşyqet auruy, jötel, entıgu, jürek ainu jäne ış ötu baiqalady. Auyr jaǧdaida ökpenıŋ ısınuı men tynys jetıspeuşılıgı damuy yqtimal.
DDŪ men sarapşylar hantavirustyŋ COVID-19 sekıldı jahandyq pandemiiaǧa ainalu qaupın tömen dep baǧalap otyr. Sebebı virus aua-tamşy jolymen tez taralmaidy jäne jūqpalylyǧy äldeqaida tömen.
Mamandar halyqqa qarapaiym saqtyq şaralaryn ūstanuǧa keŋes beredı. Atap aitqanda, üi-jaidy taza ūstau, kemırgışterden qorǧau, taǧamdy jabyq saqtau, tazalau kezınde maska men qolǧap paidalanu jäne qoldy jiı juu qajet.
Qazırgı taŋda hantavirusqa qarsy arnaiy vaksina men lisenziialanǧan virusqa qarsy em joq. Emdeu nauqastyŋ jaǧdaiyn baqylauǧa jäne asqynulardyŋ aldyn aluǧa baǧyttalady.
