قازاقستانداعى جوعارى وقۋ ورىندارىندا وقۋ اقىسى ايتارلىقتاي وسكەن، دەپ حابارلايدى "ادىرنا" ۇلتتىق پورتالى.
بۇل تۋرالى قازاقستان رەسپۋبليكاسىنىڭ ۇلتتىق ستاتيستيكا بيۋروسى دەرەكتەرىنە سىلتەمە جاساپ حابارلاندى.
مالىمەتكە سايكەس، ءبىر جىل ىشىندە ۋنيۆەرسيتەتتەردەگى وقۋ قۇنى ورتا ەسەپپەن 11%-عا ارتقان. ساراپشىلار مۇنىڭ نەگىزگى سەبەبى رەتىندە ينفلياتسيالىق ۇدەرىستەردى اتاپ وتىر.
وڭىرلەر بويىنشا ەڭ جوعارى ءوسىم اتىراۋ وبلىسىندا تىركەلدى — 36,3%. سونداي-اق تۇركىستان وبلىسىندا (19,6%), ماڭعىستاۋ وبلىسىندا (15,4%), شىمكەنت قالاسىندا (15,2%) جانە استانادا (15%) وقۋ اقىسى ايتارلىقتاي ارتقان.
ال ەڭ تومەن ءوسىم قوستاناي وبلىسىندا (1,8%), اقتوبە وبلىسىندا (5%) جانە ۇلىتاۋ وبلىسىندا (5,9%) بايقالعان. الماتى قالاسىندا وقۋ اقىسى 9,4%-عا قىمباتتاسا، الماتى وبلىسىندا باعا وزگەرىسسىز قالعان.
ساراپتاماعا سايكەس، 2025–2026 وقۋ جىلىنىڭ باسىندا استانا مەن الماتىداعى ۋنيۆەرسيتەتتەردە وقۋ قۇنى وڭىرلەرمەن سالىستىرعاندا الدەقايدا جوعارى. ماسەلەن، الماتىدا جىلدىق وقۋ اقىسى 500 مىڭنان 7,6 ميلليون تەڭگەگە دەيىن جەتەدى. بۇل ايىرماشىلىق وقۋ ورنىنىڭ بەدەلى، ماماندىقتىڭ سۇرانىسى جانە باسقا دا فاكتورلارعا بايلانىستى.
ال وڭىرلىك ۋنيۆەرسيتەتتەردە وقۋ اقىسى جىلىنا شامامەن 450 مىڭ تەڭگەدەن 2,4 ميلليون تەڭگەگە دەيىن بارادى.
