وبلىس اكىمى مۇرات ەرگەشباەۆتىڭ، قر پارلامەنتى سەناتى مەن ءماجىلىسىنىڭ دەپۋتاتتارى رۋسلان رۇستەموۆ، مۇرات ابەنوۆ، مارحابات جايىمبەتوۆتىڭ، ءماسليحات دەپۋتاتتارى، زيالى قاۋىم وكىلدەرى، ەل اعالارىنىڭ قاتىسۋىمەن سول جاعالاۋداعى 10 تۇرعىن ءۇي كەشەنىنىڭ 600 پاتەرىن يەلەرىنە تابىستاۋ ءراسىمى ءوتتى.
قىزىلوردا قالاسىنداعى سىرداريا وزەنىنىڭ سول جاعالاۋى – كەيىنگى جىلدارى ەرەكشە قارقىنمەن دامىعان اۋماق. مۇندا الەۋمەتتىك نىساندار مەن تۇرعىن ءۇي سانى جىل وتكەن سايىن ارتىپ كەلەدى. وسى اۋماقتا زاماناۋي ۋربانيستيكالىق شەشىمدەر نەگىزىندە جايلى ءارى قولايلى ينفراقۇرىلىم قالىپتاسىپ ۇلگەردى.
بۇگىندە سول جاعالاۋدا 169 نىسان بار، 136 كوپقاباتتى تۇرعىن ءۇي پايدالانۋعا بەرىلىپ، مىڭداعان وتباسى باسپانالى بولدى. حالىققا قولايلى ورتا قالىپتاستىرۋ ماقساتىندا 20 الەۋمەتتىك جانە 13 بيزنەس نىسانى جۇمىس ىستەيدى.
قازىرگى ۋاقىتتا مۇندا 47 قۇرىلىس سالىنىپ جاتىر. ونىڭ 25-ءى –كوپقاباتتى تۇرعىن ءۇي، 20-سى –كاسىپكەرلىك نىسان، ءبىر اۋرۋحانا جانە ءبىر ەمحانا. تۇرعىنداردىڭ قاۋىپسىز جول قوزعالىسىن ۇيىمداستىرۋ ماقساتىندا يسا توقتىباەۆ كوشەسىنەن سول جاعالاۋعا وتەتىن ءتورت جولاقتى جاڭا اۆتوموبيل كوپىرىن سالۋ جوسپارلانعان.
جاڭا شاعىن اۋدان تۇرعىندارىنىڭ سانى 25 مىڭنان استى، مەكتەپ، بالاباقشا، ساۋدا ورىندارى حالىق سۇرانىسىنا ساي قىزمەت كورسەتەدى. قوعامدىق كولىك ۇزدىكسىز قاتىنايدى. بۇگىن كىلتى تاپسىرىلعان جاڭا ۇيلەردىڭ تۇرعىندارى دا سول جاعالاۋلىقتار قاتارىن تولىقتىردى.
سالتاناتتى راسىمدە ءسوز سويلەگەن ايماق باسشىسى كەيىنگى جىلدارداعى حالىقتىڭ تۇرمىس ساپاسىن ارتتىرۋعا باعىتتالعان اۋقىمدى جوبالاردى اتاپ ءوتتى.
«مەملەكەت باسشىسى قاسىم-جومارت كەمەلۇلى «قولجەتىمدى باسپانا – ارمان ەمەس، ءبىزدىڭ ازاماتتارىمىزدىڭ الدىنداعى مىندەتىمىز» دەگەن بولاتىن. بۇگىن تۇرعىن ءۇي كەزەگىندە تۇرعان جەرلەستەرىمىزگە جالپى اۋماعى 33 مىڭ شارشى مەتردەن اساتىن 600 پاتەردىڭ كىلتىن تابىستاپ وتىرمىز.
تۇرعىن ءۇي كەشەنىنىڭ اۋماعىندا ەكى فۋتبول، ءتورت سپورت جانە ويىن الاڭى، تىنىعۋ ايماعى، 250 ورىندىق اۆتوتۇراق جانە ءۇش كوممەرتسيالىق نىسان ورنالاسقان. الداعى ۋاقىتتا دا شاھار كەلبەتىنە ءسان بەرەتىن زاماناۋي تۇرعىن ۇيلەر بوي كوتەرەدى.
مەنشىكتى باسپانا – تۇراقتىلىق پەن ەرتەڭگى كۇنگە دەگەن سەنىمنىڭ كەپىلى. جاڭا قونىستارىڭىز قۇتتى بولسىن! ءار شاڭىراققا باق-بەرەكە، ىرىس پەن ىنتىماق تىلەيمىن»، – دەدى مۇرات ەرگەشباەۆ.
وبلىس اكىمى بۇل جوبالاردىڭ ايماقتاعى قۇرىلىس سالاسىنىڭ الەۋەتىنە، قۇرىلىسشىلاردىڭ كاسىبي دەڭگەيىنە وڭ ىقپال ەتكەنىن جەتكىزدى.
قىزىلورداداعى تۇرعىن ءۇي قۇرىلىسىنىڭ قارقىنىن ءوڭىردىڭ الەۋمەتتىك-ەكونوميكالىق دامۋ كورسەتكىشتەرىنەن دە، اي سايىنعى وسىنداي راسىمدەر مەن قونىستويلاردان دا بايقاۋعا بولادى. بۇل تۇرعىنداردى باسپانامەن قامتۋ جۇمىستارىنىڭ ءبىر جۇيەگە تۇسكەنىن كورسەتەدى. بيىلدىڭ وزىندە تۇرعىن ءۇي كەزەگىندەگى ازاماتتارعا 2400 پاتەر تابىستاۋ ءۇشىن بيۋدجەتتەن 55 ملرد تەڭگەدەن استام قارجى قاراستىرىلعان.
جيىندا پارلامەنت ءماجىلىسىنىڭ دەپۋتاتى مارحابات جايىمبەتۇلى ءسوز سويلەپ، ەل اعاسى يمامادين زاكىرۇلى باتاسىن بەردى. تۇرعىن ءۇيدى ساپالى ەتىپ سالعان قۇرىلىسشىلار وبلىس اكىمىنىڭ العىس حاتىمەن ماراپاتتالدى.
