حاماس سوڭعى جيىرما جىل بويى گازا سەكتورىن باسقارعان اكىمشىلىك قۇرىلىمىن تاراتتى، دەپ حابارلايدى “ادىرنا” ءتىلشىسى Euronews-قا سىلتەپ.
شەتەلدىك باق مالىمەتىنشە، حاماس 2007 جىلدان بەرى گازا سەكتورىن باقىلاۋدا ۇستاپ كەلگەن.
حاماس-تىڭ ۇكىمەتتىك مەديا كەڭسەسىنىڭ باسشىسى يسمايل ات-تاۆباتتىڭ ايتۋىنشا، توتەنشە كوميتەتتىڭ جەتەكشىسى مۇحاممەد ءال-فاررا قىزمەتىنەن كەتىپ، كوميتەتتى تاراتۋ تۋرالى شەشىم قابىلداعان. بۇل قادام گازا سەكتورىن باسقارۋ جونىندەگى ۇلتتىق كوميتەتكە اكىمشىلىك وكىلەتتىكتەردى كەزەڭ-كەزەڭىمەن تاپسىرۋدى جەڭىلدەتۋگە باعىتتالعان.
جاڭا ۇلتتىق كوميتەتتى پالەستينالىق تەحنوكرات الي شاات باسقارادى. الايدا كوميتەت بىرنەشە اي بويى گازا سەكتورىنان تىس جەردە جۇمىس ىستەپ كەلگەن. بۇعان ءيزرايلدىڭ ونىڭ مۇشەلەرىنىڭ ايماققا كىرۋىنە قارسىلىق تانىتۋى سەبەپ بولعانى ايتىلىپ وتىر.
حاماس وكىلى حازەم كاس قوزعالىستىڭ گازا سەكتورىن باسقارۋدان باس تارتۋى وككۋپاتسياعا سىلتاۋ بولاتىن سەبەپتەردى جويۋعا باعىتتالعانىن حابارلاعان.
سونىمەن قاتار، حاماس ءوز شەشىمى تۋرالى وزگە پالەستينالىق ساياسي قوزعالىستاردى كايردە وتكەن كەزدەسۋدە حاباردار ەتكەن.
دەگەنمەن، گازاداعى قاقتىعىستان كەيىنگى باسقارۋ ماسەلەسى مەن حاماس-تى قارۋسىزداندىرۋ ماسەلەسى تاراپتار اراسىنداعى نەگىزگى كەلىسپەۋشىلىكتەردىڭ ءبىرى بولىپ قالا بەرۋدە. يزرايل حاماس-تىڭ بيلىككە قايتا ورالۋىنا قارسى بولسا، پالەستينا اكىمشىلىگىنىڭ گازانى تىكەلەي باسقارۋىنا دا كەلىسىم بەرمەي وتىر. ال حاماس قارۋ-جاراق ماسەلەسىن قاراستىرماس بۇرىن پالەستينالىق اكىمشىلىك قۇرىلۋى قاجەت دەگەن ۇستانىمدا.
