استانادا LRT جۇمىسىن پرەزيدەنت باقىلادى، دەپ حابارلايدى "ادىرنا" ۇلتتىق پورتالى.
16 مامىردا قازاقستان پرەزيدەنتى قاسىم-جومارت توقاەۆ Astana LRT جوباسىنىڭ جۇمىسىن باستادى.
مەملەكەت باسشىسى العاشقى جولاۋشى رەتىندە «اۋەجاي» ستانساسىنان «ۇلتتىق مۋزەي» ستانساسىنا دەيىن ءجۇرىپ ءوتتى. سونداي-اق پرەزيدەنت قوعامدىق كولىكتىڭ، سونىڭ ىشىندە LRT جۇيەسىنىڭ جۇمىسىن باقىلايتىن بىرىڭعاي ديسپەتچەرلىك ورتالىقتىڭ قىزمەتىمەن تانىستى.
استانا اكىمى جەڭىس قاسىمبەك LRT ىسكە قوسىلۋىنا بايلانىستى ارنايى ديسپەتچەرلىك قىزمەت قۇرىلعانىن ايتتى. قازىرگى تاڭدا قوعامدىق كولىكتى باقىلاۋ مەن رەتتەۋ جۇمىسىنا 21 مامان تارتىلعان.
ءاربىر LRT پويىزى 600-دەن استام جولاۋشىنى تاسىمالداۋعا ارنالعان. ۇزىندىعى 22,4 شاقىرىم بولاتىن جەلىدە 15 پويىز قاتىنايدى، ونىڭ تورتەۋى رەزەرۆتە بولادى. پويىزدار جۇرگىزۋشىسىز رەجيمدە جۇمىس ىستەيدى. جۇيەدەگى قوزعالىس، جىلدامدىقتى ارتتىرۋ، تەجەۋ جانە ەسىكتەردى اشۋ ۇدەرىستەرى تولىق اۆتوماتتاندىرىلعان.
جوبا اياسىندا 18 ستانسا مەن زاماناۋي دەپو سالىنعان. مارشرۋتتىڭ تولىق ۇزىندىعىن ءجۇرىپ وتۋگە شامامەن 40 مينۋت كەتەدى. پويىزداردىڭ ورتاشا جىلدامدىعى ساعاتىنا 50–60 شاقىرىمدى قۇرايدى، ال قوزعالىس ارالىعى 5–6 مينۋت بولادى.
پرەزيدەنت LRT جوباسىنىڭ استانا مەن بۇكىل قازاقستان ءۇشىن ماڭىزى زور ەكەنىن اتاپ ءوتتى. ونىڭ ايتۋىنشا، بولاشاقتا ەلوردا ەۋرازياداعى ءىرى كولىك حابىنا اينالۋى ءتيىس.
مەملەكەت باسشىسىنا №001 سەريالى ارنايى كارتا تابىستالدى. سونىمەن قاتار LRT-ءتىڭ ەكىنشى كەزەڭىن جۇزەگە اسىرۋ ماسەلەسى قاراستىرىلىپ جاتىر. جاڭا جەلىلەر «استانا-1» ۆوكزالى، «جاعالاۋ» تۇرعىن الابى جانە قوسشى باعىتىنا تارتىلماق. ەكىنشى كەزەڭنىڭ جالپى ۇزىندىعى 26,5 شاقىرىمدى قۇرايدى جانە 20 ستانسا سالۋ جوسپارلانعان.
جوبا سوڭىندا پرەزيدەنت قىتايلىق كومپانيا وكىلدەرىنە، CTS Transportation جانە Astana LRT قىزمەتكەرلەرىنە ساتتىلىك تىلەدى.
«This is only the first step! – بۇل تەك العاشقى قادام!» – دەدى قاسىم-جومارت توقاەۆ.
