پرەزيدەنت قاسىم-جومارت توقاەۆتىڭ توراعالىعىمەن سيرەك كەزدەسەتىن مەتالدار سالاسىن دامىتۋ ماسەلەلەرى جونىندە قاۋىپسىزدىك كەڭەسىنىڭ وتىرىسى ءوتتى، دەپ حابارلايدى “ادىرنا”.
مەملەكەت باسشىسى قازاقستاننىڭ رەسۋرس قورى مەن وندىرىستىك الەۋەتى جاعىنان ورتالىق ازيادا جەتەكشى ورىن الاتىنىن اتاپ ءوتتى. پرەزيدەنت بۇل مۇمكىندىكتەردى ەل مۇددەسىنە ءتيىمدى پايدالانۋ قاجەت ەكەنىن ايتتى.
پرەزيدەنت قاسىم-جومارت توقاەۆتىڭ پىكىرىنشە، الەمدەگى قازىرگى احۋال تابيعي رەسۋرستارعا باي مەملەكەتتەر ءۇشىن جاڭا مۇمكىندىكتەر اشىپ وتىر. سونىمەن قاتار اسا ماڭىزدى ماتەريالدارعا قول جەتكىزۋ ءۇشىن مەملەكەتتەر اراسىنداعى باسەكەلەستىك كۇشەيىپ كەلەدى.
پرەزيدەنت بۇل باعىتتىڭ جوعارى تەحنولوگيالىق سالالاردى دامىتۋ ءۇشىن ستراتەگيالىق ماڭىزى بار ەكەنىن اتاپ ءوتتى. وسىعان بايلانىستى قازاقستان قولدا بار رەسۋرستار مەن وندىرىستىك الەۋەتتى ءتيىمدى پايدالانىپ، ءوندىرىس تىزبەگىن جۇيەلى تۇردە دامىتۋى قاجەت.
وتىرىستا ۇكىمەت مۇشەلەرى سالانىڭ قازىرگى جاعدايى، مينەرالدىق رەسۋرستار قورىن يگەرۋ پەرسپەكتيۆالارى، قايتا وڭدەۋ ءوندىرىسىن دامىتۋ جانە سالاداعى نەگىزگى كەدەرگىلەر تۋرالى باياندادى.
جيىن قورىتىندىسى بويىنشا ۇكىمەتكە جانە ءتيىستى مەملەكەتتىك ورگاندارعا بىرقاتار ناقتى تاپسىرما بەرىلدى.
اتاپ ايتقاندا، سالانى دامىتۋدىڭ جۇيەلى ءتاسىلىن قالىپتاستىرۋ، رەتتەۋ تەتىكتەرىن جەتىلدىرۋ، گەولوگيالىق بارلاۋ مەن وڭدەۋ جۇمىستارىن دامىتۋ، تەحنوگەندىك مينەرالدىق تۇزىلىمدەردى ەكونوميكالىق اينالىمعا ەنگىزۋ كوزدەلدى.
سونداي-اق زەرتحانالاردىڭ ماتەريالدىق-تەحنيكالىق بازاسى مەن كادرلىق الەۋەتىن كۇشەيتۋ جانە اكىمشىلىك كەدەرگىلەردى جويۋ جونىندە تاپسىرمالار بەرىلدى.
