ۇلىتاۋ وبلىسىنىڭ وڭىرلىك كوممۋنيكاتسيالار الاڭىندا قۇرىلىس، ساۋلەت جانە قالا قۇرىلىسى باسقارماسىنىڭ باسشىسى رينات الماتوۆ بۇقارالىق اقپارات قۇرالدارى وكىلدەرىنىڭ قاتىسۋىمەن بريفينگ وتكىزدى.
بريفينگ بارىسىندا وڭىردەگى قۇرىلىس سالاسىنىڭ دامۋ قارقىنى مەن الداعى جوسپارلار كەڭىنەن تانىستىرىلدى.
2025 جىلدىڭ قورىتىندىسى بويىنشا وبلىستا 109,8 مىڭ شارشى مەتر تۇرعىن ءۇي پايدالانۋعا بەرىلگەن. ال بيىل بارلىق قارجىلاندىرۋ كوزدەرى ەسەبىنەن 111,4 مىڭ شارشى مەتر تۇرعىن ءۇيدى ىسكە قوسۋ جوسپارلانىپ وتىر.
قازىرگى تاڭدا جەكە ينۆەستيتسيالار ەسەبىنەن جالپى اۋدانى 57,6 مىڭ شارشى مەتردى قۇرايتىن 14 كوممەرتسيالىق تۇرعىن ءۇيدىڭ قۇرىلىسى جۇرگىزىلۋدە. ونىڭ ىشىندە بيىل جالپى اۋدانى 36,1 مىڭ شارشى مەتر بولاتىن 8 تۇرعىن ءۇيدى پايدالانۋعا بەرۋ كوزدەلسە، قالعان 6 تۇرعىن ءۇيدىڭ قۇرىلىسى 2027 جىلعا وتپەلى.
جالپى العاندا، 2026 جىلى اۋدانى 73 مىڭ شارشى مەتر بولاتىن 14 تۇرعىن ءۇيدىڭ قۇرىلىسى اياقتالادى. ونىڭ ىشىندە 3 كرەديتتىك، 3 جالعا بەرىلەتىن جانە 8 كوممەرتسيالىق تۇرعىن ءۇي بار. بۇل ءوز كەزەگىندە 833 وتباسىنىڭ باسپانالى بولۋىنا مۇمكىندىك بەرەدى.
سونىمەن قاتار، 2024 جىلدان باستاپ وبلىس ورتالىعىنىڭ باتىس اۋدانىنداعى جاڭا شاعىن اۋداندى قاجەتتى ينفراقۇرىلىممەن قامتاماسىز ەتۋ ماقساتىندا ماگيسترالدىق جەلىلەردىڭ قۇرىلىسى جۇرگىزىلۋدە. جوبانى اياقتاۋ مەرزىمى – 2026 جىل.
بيىل وبلىستا الەۋمەتتىك نىساندار قۇرىلىسى بويىنشا جالپى سانى 11 جوبا جۇزەگە اسىرىلىپ جاتىر.
اتاپ ايتقاندا، قاراجال قالاسىندا جابىق حوككەي كورتى مەن كوپفۋنكتسيونالدى ورتالىقتىڭ قۇرىلىسى جۇرگىزىلۋدە. حوككەي كورتى مەن ۇلىتاۋ اۋىلى اۋىلىنداعى جابىق ءجۇزۋ باسسەينىن قىركۇيەك ايىندا پايدالانۋعا بەرۋ جوسپارلانعان. ال قاراجالداعى كوپفۋنكتسيونالدى ورتالىق جىل سوڭىنا دەيىن ەل يگىلىگىنە تابىستالادى.
سونداي-اق، جەزقازعان قالاسىندا كۋرسانتتارعا ارنالعان پاۆيلونى بار اۆتوماتتاندىرىلعان اۆتودروم قۇرىلىسىن اياقتاۋ ءۇشىن مەردىگەر ۇيىم انىقتالىپ، ارنايى تەحنيكا مەن قاجەتتى جابدىقتار جۇمىلدىرىلۋدا.
جەزقازعاندا وقۋشىلار سارايىنىڭ قۇرىلىسى تولىق اياقتالىپ، قازىرگى ۋاقىتتا اۋماقتى اباتتاندىرۋ جۇمىستارى جۇرگىزىلىپ جاتىر.
ال ۇلىتاۋ اۋىلىندا ءبىر اۋىسىمدا 100 كەلۋشىنى قابىلدايتىن ەمحاناسى بار، 20 توسەك-ورىنعا ارنالعان اۋىلدىق اۋرۋحانانىڭ قۇرىلىسى جالعاسۋدا. جوبانى اياقتاۋ مەرزىمى – 2026 جىلدىڭ سوڭى.
ساتباەۆ قالاسىندا يندۋستريالىق پاركتىڭ ينجەنەرلىك-كوممۋنيكاتسيالىق ينفراقۇرىلىمىنىڭ قۇرىلىسى بيىل مامىر ايىندا اياقتالادى دەپ جوسپارلانعان.
بۇدان بولەك، 2026 جىلى وڭىردە تاعى 3 جاڭا جوبانىڭ قۇرىلىسى باستالدى. ولار: جاڭاارقا اۋدانىندا 100 ورىندىق ينكليۋزيانى قولداۋ ورتالىعىنىڭ قۇرىلىسى، ساتباەۆ قالاسىنداعى «بم №7» كمم سپورت زالىنىڭ قۇرىلىسى جانە اقسەلەۋ سەيدىمبەك اتىنداعى ورتا مەكتەپتىڭ سپورت زالىن سالۋ جوبالارى.
