ۇلىتاۋ وبلىسىنىڭ اكىمى بەرىك ابدىعاليۇلى ءبىر كەزدەگى ۇسىنىستارىندا ازىرگە وزگەرىس جوق ەكەنىن ايتتى، دەپ حابارلايدى "ادىرنا". بۇل تۋرالى ulysmedia.kz جازدى.
بۇگىن استانادا ورتالىق كوممۋنيكاتسيالار قىزمەتى الاڭىندا وتكەن بريفينگتە بەرىك ابدىعاليۇلى ۇلىتاۋ وبلىسىنىڭ الەۋمەتتىك-ەكونوميكالىق دامۋى تۋرالى بايانداعان.
ول وسىدان بىرنەشە اي بۇرىن بىرقاتار وبلىستاردىڭ اتاۋىن وزگەرتۋ جونىندە ۇسىنىس ايتقان. بريفينگ سوڭىندا جۋرناليستەر سۇراعىنا جاۋاپ بەرە كەلە ول وسى ماسەلەدە بۇعان دەيىنگى پىكىرى وزگەرمەگەنىن، الايدا ايتقاندارى ۇسىنىس كۇيىندە قالعانىن حاباردار ەتتى.
"مەن - "قازاق ءتىلى" رەسپۋبليكالىق قوعامىنىڭ جەتەكشىسىمىن. عىلىمي كونفەرەنتسيالاردىڭ بىرىندە مەن ءوز كوزقاراسىمدى ءبىلدىردىم. بۇل - مەنىڭ جەكە كوزقاراسىم. وسى تۋرالى بۇرىن قوعامدىق جوبالارىمدا ايتقان بولاتىنمىن. بۇل مەنىڭ ۇسىنىسىم بولىپ قالا بەردى", - دەدى ول.
ەستەرىڭىزگە سالا كەتەيىك، 2023 جىلدىڭ 28 اقپاندا بەرىك ابدىعاليۇلى "ۇلىتاۋ وبلىسىنىڭ رۋحاني دامۋى" رەسپۋبليكالىق عىلىمي-پراكتيكالىق كونفەرەنتسياسىندا قازاقستاننىڭ بىرنەشە ءوڭىرىنىڭ اتاۋىن وزگەرتۋدى ۇسىندى. شەنەۋنىك باتىس قازاقستان وبلىسىن - اقجايىق، شىعىس قازاقستان وبلىسىن - التاي، سولتۇستىك قازاقستان وبلىسىن - قىزىلجار، پاۆلودار وبلىسىن باياناۋىل دەپ وزگەرتۋ كەرەكتىگىن ايتتى. ونىڭ
پىكىرىنشە، بۇل ەلدىڭ بارلىق تۇرعىندارىن شابىتتاندىرادى.
بۇعان دەيىن قازاقستاندىق ديپلومات - قازاقستاننىڭ مىسىرداعى ەلشىسى قايرات لاما شاريف Facebook-پاراقشاسىندا كسرو كەزىنەن قالعان بىرقاتار قالا مەن وبلىس اتاۋلارىنان ارىلۋدى جانە مەملەكەتى اتاۋىنا قاتىستى ءوز پايىمىن ۇسىنعان بولاتىن. كەيىننەن پرەزيدەنت ەلشىگە سوگىس جاريالادى. ارتىنشا جازبا ءوشىرىلدى.
ودان دا قىزىعى ەلشى جازبالارىنان كوپ ۇزاماي قۇرىلعان جاڭا وبلىستاردىڭ اتاۋى لاما شاريف ۇسىنىسىمەن سايكەس كەلگەن. اباي، جەتىسۋ جانە ۇلىتاۋ اتاۋلارى العاش قايرات لاما ءشاريفتىڭ جازبالارىندا اتالعان بولاتىن.
ال ەلشىنىڭ مەملەكەتتىك قىزمەتكەرلەردىڭ ادەپ كودەكسىنىڭ 9-تارماعىنىڭ تالاپتارىن ساقتاماعانى ءۇشىن سوگىس العانى ايتىلعان.
ادەپ كودەكسىنىڭ "مەملەكەتتىك قىزمەتشىلەردىڭ قىزمەتتىك ادەبىنىڭ ستاندارتتارى" دەگەن 3-تاراۋى 9-تارماعىندا بىلاي دەلىنگەن: "مەملەكەتتىك قىزمەتشىلەر مەملەكەتتىك ساياسات جانە قىزمەتتىك جۇمىس ماسەلەلەرى جونىندەگى ءوز پىكىرىن، ەگەر ول مەملەكەتتىك ساياساتتىڭ نەگىزگى باعىتتارىنا سايكەس كەلمەسە، جاريالاۋعا رۇقسات ەتىلمەگەن قىزمەتتىك اقپاراتتى اشاتىن بولسا جانە مەملەكەتتىڭ لاۋازىمدى ادامدارىنىڭ، مەملەكەتتىك باسقارۋ ورگاندارىنىڭ، باسقا دا مەملەكەتتىك قىزمەتشىلەردىڭ اتىنا ادەپسىز سوزدەردى قامتيتىن بولسا، كوپشىلىك الدىندا بىلدىرمەۋگە ءتيىس".
