بۇگىن استانا قالاسىندا پرەزيدەنت جانىنداعى ورتالىق كوممۋنيكاتسيالار قىزمەتىنىڭ الاڭىندا وتكەن بريفينگ بارىسىندا باتىس قازاقستان وبلىسىنىڭ اكىمى ناريمان تورەعاليەۆ ءوڭىردىڭ الەۋمەتتىك-ەكونوميكالىق دامۋ قورىتىندىلارى جونىندە باياندادى.
ءوڭىر باسشىسى ءوز سوزىندە مەملەكەت باسشىسى قاسىم-جومارت توقاەۆتىڭ جولداۋىندا جۇكتەلگەن مىندەتتەردىڭ وبلىستا جۇيەلى تۇردە جۇزەگە اسىپ جاتقانىن اتاپ ءوتتى.
وبلىس اكىمىنىڭ ايتۋىنشا بقو-دا وتكەن جىلدىڭ قورىتىندىسىمەن وبلىس ەكونوميكاسىنىڭ نەگىزگى سالالارى بويىنشا تۇراقتى وسىمگە قول جەتكىزگەن. بيىل دا ەكونوميكانىڭ ءوسۋ قارقىنى ساقتالۋدا.
اتاپ ايتقاندا، قۇرىلىس سالاسىنداعى جۇمىستار كولەمى 9%-عا، تۇرعىن ءۇيدى پايدالانۋعا بەرۋ كورسەتكىشى 4,1%-عا ارتىپ، نەگىزگى كاپيتالعا سالىنعان ينۆەستيتسيالار 1,2%-عا ءوستى. ىشكى ساۋدا كولەمى 0,7%-عا ، كولىك قىزمەتتەرى 1,2%-عا، بايلانىس قىزمەتتەرى 6,2%-عا، ونەركاسىپ 3,6%-عا، ال اۋىل شارۋاشىلىعىنىڭ جالپى ءونىمى 6,4%-عا ارتتى.
جىل باسىنان بەرى وبلىسقا 567 ملرد تەڭگە كولەمىندە ينۆەستيتسيا تارتىلىپ، ونىڭ 80 پايىزى تەڭگەسى – جەكە سەكتوردىڭ ۇلەسىن قۇراعان.
الداعى بەس جىلدا 4,4 ترلن تەڭگەگە 10 مىڭنان استام جاڭا جۇمىس ورنىن قۇرۋمەن 73 ءىرى ينۆەستيتسيالىق جوبانى جۇزەگە اسىرۋ جوسپارلانىپ وتىر.
بقو-نىڭ وڭدەۋ ونەركاسىبىنىڭ كولەمى 17 پايىزعا ءوسىپ، 303 ملرد تەڭگەنى قۇرادى. تىكەلەي شەتەلدىك كاپيتالدى تارتۋ ماقساتىندا بيىل چەحيا، رەسەي، يران، قىتاي جانە وڭتۇستىك كورەيا ەلدەرىنە بارىپ بىرقاتار الەۋەتتى ينۆەستورلارمەن كەلىسسوزدەر جۇرگىزىلگەن. ناتيجەسىندە، ونەركاسىپ، قۇرىلىس، مەديتسينا، ەنەرگەتيكا جانە اۋىل شارۋاشىلىعى سالالارىندا جالپى قۇنى 1 ترلن تەڭگە بولاتىن جوبالار بويىنشا مەموراندۋمدارعا قول قويىلدى.
اگروونەركاسىپ باعىتىندا 50,6 ملرد تەڭگە كولەمىندە قولداۋ كورسەتىلدى. اۋىل شارۋاشىلىعىنىڭ جالپى ءونىم كولەمى 6,4%-عا ارتىپ، 281 ملرد تەڭگەگە جەتتى.
2025–2027 جىلدارى اۋىل شارۋاشىلىعى سالاسىندا جالپى قۇنى 68,1 ملرد تەڭگەنى قۇرايتىن 54 ينۆەستيتسيالىق جوبانى جۇزەگە اسىرۋ ارقىلى 870 جۇمىس ورىنىن قۇرۋ جوسپارلانعان.
ال بيىلدىڭ وزىندە جالپى قۇنى 15,4 ملرد تەڭگە بولاتىن 18 جوبا ىسكە اسىرىلۋدا.
بقو اكىمىنىڭ باستاماسىمەن وبلىستا «قالادان اۋىلعا» جوباسى ىسكە قوسىلعان بولاتىن. قىسقا مەرزىم ىشىندە-اق اۋىل تۇرعىندارى مەن قونىس اۋدارۋشىلار تاراپىنان كەڭ قولداۋ تاپقان. جوبا اياسىندا قالا ايماقتارىنان مىڭعا جۋىق تۇرعىنى بار 195 وتباسى اۋىلعا قونىس اۋداردى. ونىڭ 600-ى بالا.قونىس اۋدارعان وتباسىلاردىڭ بارلىعى دا باسپانامەن قامتاماسىز ەتىلىپ، تۇراقتى جۇمىسقا ورنالاسقان.
ءوڭىر ەكونوميكاسىنىڭ دامۋىنا شاعىن جانە ورتا كاسىپكەرلىك زور ۇلەسىن قوسىپ كەلەدى. وتكەن ءۇش جىلدا وبلىستا جۇمىس ىستەپ تۇرعان شاعىن جانە ورتا كاسىپكەرلىك سۋبەكتىلەرىنىڭ سانى 57,6 مىڭنان 59,2 مىڭعا نەمەسە 2,7%-عا وسكەن. اتالعان سالادا 130 مىڭعا جۋىق ادام جۇمىسپەن قامتىلعان. وڭىرلىك ونىمدەگى شاعىن جانە ورتا كاسىپكەرلىكتىڭ ۇلەسى 36,7% دەڭگەيىنە جەتتى. بۇل كورسەتكىش بويىنشا بقو رەسپۋبليكادا الدىڭعى بەستىكتە.
مەملەكەت باسشىسىنىڭ تاپسىرمالارىن جۇزەگە اسىرۋ ارقىلى ءوڭىر تۇرعىندارىنىڭ ءومىر ساپاسىن ارتتىرۋعا باعىتتالعان جۇيەلى جانە ناقتى جۇمىستار اتقارىلعان.
ماسەلەن، دەنساۋلىق ساقتاۋ سالاسىندا 2023 جىلدان بەرى 52 دەنساۋلىق ساقتاۋ نىسانى سالىندى. ونىڭ ىشىندە «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 50 مەديتسينالىق نىسان پايدالانۋعا بەرىلگەن.
بالالاردىڭ ساپالى ءبىلىم الۋىنا قولايلى جاعداي جاساۋ ماقساتىندا 2023 جىلدان بەرى وڭىردە 27 جاڭا مەكتەپ پايدالانۋعا بەرىلدى. ونىڭ 9-ى«كەلەشەك مەكتەپتەرى» جوباسى اياسىندا سالىندى. جىل سوڭىنا دەيىن تاعى 3 جاڭا مەكتەپ ەل يگىلىگىنە بەرىلمەك.
2023–2025 جىلدارى سپورت ينفراقۇرىلىمىن دامىتۋ ماقساتىندا 12 سپورت نىسانى پايدالانۋعا بەرىلدى.
مەملەكەت باسشىسىنىڭ وبلىسقا جۇمىس ساپارى بارىسىندا بەرگەن تاپسىرماسىنا سايكەس ورال قالاسىندا 1200 ورىندىق زاماناۋي سپورت كەشەنى ەل يگىلىگىنە بەرىلدى.
بيىل 9 سپورت نىسانىنىڭ قۇرىلىسى جالعاسۋدا، ولاردىڭ بەسەۋىن جىل سوڭىنا دەيىن اياقتاۋ جوسپارلانىپ وتىر.
سوڭعى ءۇش جىلدا بقو-دا 11 مادەنيەت ءۇي جانە مادەني-سپورتتىق كەشەن پايدالانۋعا بەرىلدى. بيىل 7 مادەنيەت نىسانىنىڭ قۇرىلىسى جۇرگىزىلىپ جاتىر، ولاردىڭ 4 جىل سوڭىنا دەيىن ىسكە قوسىلادى.
بقو-دا 1 500 شاقىرىم اۆتوموبيل جولدارى جوندەۋدەن وتكەن. سونىڭ ىشىندە جالپى ۇزىندىعى 560 شاقىرىم بولاتىن 56 ەلدى مەكەندە كىرە بەرىس جول جوندەلدى.
“مەملەكەت باسشىسىنىڭ تاپسىرماسىنا سايكەس، وبلىس ورتالىعى مەن وڭتۇستىك اۋداندار – كازتالوۆ، جانىبەك، بوكەي ورداسى باعىتىنداعى كولىك قاتىناسىن جاقسارتۋ ماقساتىندا جالپى ۇزىندىعى 245 شاقىرىم جول كۇردەلى جوندەۋدەن وتكەن. وڭىرلىك تۋريستىك كارتانىڭ توپ-50 نىسانىنا ەنگەن، رەسپۋبليكالىق ماڭىزى بار «حان ورداسى» مۇراجاي-قورىعىنا اپاراتىن ۇزىندىعى 21 شاقىرىم جول جوندەۋدەن وتكىزىلدى. سونىمەن قاتار، 4 تەمىرجول ۆوكزالى جاڭعىرتىلۋدا”،- دەدى بقو اكىمى ناريمان تورەعاليەۆ.
