اۋداندا اۋقىمدى رەسپۋبليكالىق «تازا قازاقستان» اكتسياسىن جۇزەگە اسىرۋ جالعاسۋدا. كەزەكتى اباتتاندىرۋ شاراسى «تۋعان ەلدىڭ تازالىعى – ەلدىڭ ابىرويى» اتاۋىمەن ءوتتى. زەرەندى اۋىلىنداعى ۆوستوچنايا كوشەسىن تازالاۋ جانە كوگالداندىرۋ جۇمىستارىنا 250-دەن استام ادام قاتىستى. ولاردىڭ قاتارىندا بيلىك وكىلدەرى، دەپۋتاتتار، ەرىكتىلەر جانە جەرگىلىكتى تۇرعىندار بار.
كۇننىڭ باستى وقيعاسىنا اينالعان شارا بارىسىندا 100-دەن استام جاس اعاش كوشەتتەرى وتىرعىزىلدى. سونىمەن قاتار قاتىسۋشىلار اۋماقتى سانيتارلىق تازالاۋدان وتكىزىپ، قوعامدىق ورىنداردى رەتكە كەلتىرۋ جۇمىستارىن جۇرگىزدى.
«تازا قازاقستان» — بۇل ءبىر رەتتىك اكتسيا عانا ەمەس، تۋعان جەرگە دەگەن شىنايى جاناشىرلىقتىڭ كورىنىسى. تازالىق ارقايسىمىزدان باستالادى: تازا اۋلا مەن تازا كوشە — بارلىعىمىزعا ورتاق مىندەت. وسىنداي ىسكە كوپتەگەن جەرلەستەرىمىزدىڭ بەلسەندى اتسالىسىپ جاتقانى قۋانتادى»، — دەدى زەرەندى اۋدانىنىڭ اكىمى اسەت قۇرمانعوجين.
ءىس-شاراعا اۋدان اقساقالدارىنىڭ قاتىسۋى دا ەرەكشە ءمان بەردى. ولار بىرلەسكەن ەڭبەكتى جاس ۇرپاقتى تاربيەلەۋدىڭ ماڭىزدى تەتىگى رەتىندە باعالادى.
«تابيعاتقا جاناشىرلىقپەن قاراۋ — جاس ەرەكشەلىگىنە قاراماستان بارلىعىمىزدى بىرىكتىرەتىن ورتاق پارىز. وسىنداي يگى ىستەر جاستاردى تۋعان جەردى سوزبەن ەمەس، ناقتى ىسپەن قادىرلەۋگە تاربيەلەيدى»، — دەپ پىكىر ءبىلدىردى بيلەر كەڭەسىنىڭ توراعاسى سەرىك بايمۋرزين.
شارا بلوگەرلەر مەن بەلسەندىلەردىڭ قولداۋىمەن الەۋمەتتىك جەلىلەردە كەڭىنەن ناسيحاتتالدى. اۋدان اكىمدىگىندە اباتتاندىرۋ جۇمىستارى الداعى ۋاقىتتا دا تۇراقتى تۇردە جالعاسىپ، تازالىق پەن ءتارتىپ قاعيداتتارى ءوڭىردىڭ ءاربىر تۇرعىنى ءۇشىن كۇندەلىكتى ءومىر سالتىنا اينالاتىنىن اتاپ ءوتتى.
