قاراعاندى وبلىسىنىڭ مەكتەپتەرىندە ء«بول، تاپسىر، قايتا وڭدە!» ەكولوگيالىق جوباسى جالعاسۋدا. باعدارلاما ماقساتى – جاس ۇرپاقتىڭ تابيعاتقا جاناشىرلىعىن قالىپتاستىرۋ، تۇرمىستىق قاتتى قالدىقتاردى سۇرىپتاپ جيناۋ مادەنيەتىن كەڭىنەن ناسيحاتتاۋ جانە ەكولوگيالىق ساۋاتتىلىقتى ارتتىرۋ.
جوبا قاراعاندى وبلىسىنىڭ تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ باستاماسىمەن جۇزەگە اسىرىلۋدا.
3–5 قاراشا كۇندەرى ەكولوگيا جانە تابيعاتتى پايدالانۋ سالاسىنىڭ ماماندارى شاحتينسك مەن ساران قالالارىنىڭ مەكتەپتەرىندە ينتەراكتيۆتى دارىستەر مەن اشىق ساباقتار وتكىزۋدە. بۇگىنگە دەيىن وبلىستىڭ 30 مەكتەبىنەن شامامەن 1500 وقۋشى اتالعان جوباعا قامتىلدى.
– ەندى ءبىز تازا قالا وزىمىزدەن باستالاتىنىن ناقتى بىلەمىز! ءبىز – ءبىر كوماندامىز، جانە شاحتينسكىنى تازالىقتىڭ ۇلگىسىنە اينالدىرۋ قولىمىزدان كەلەدى، - دەيدى س. سەيفۋللين اتىنداعى گيمنازيانىڭ 8-سىنىپ وقۋشىسى انگەلينا پولوجاەۆا. – ءبىز ەكولوگيانى قورعاۋعا ءسوز جۇزىندە عانا ەمەس، ءىس جۇزىندە دە ارەكەت ەتەمىز.
ساباقتار بارىسىندا بالالار قالدىقتاردىڭ اينالىمى، ولاردىڭ قورشاعان ورتاعا اسەرى جانە قايتا وڭدەۋدىڭ ەكونوميكا مەن ەكولوگيا ءۇشىن بەرەر پايداسى تۋرالى تۇسىنىك الادى. پراكتيكالىق بولىمگە ەرەكشە كوڭىل بولىنگەن: وقۋ ورىندارىندا قالدىقتاردى بولەك جيناۋ جۇيەسى ەنگىزىلىپ، وقۋشىلاردى ەكولوگيالىق باستامالار مەن ەرىكتىلىككە تارتۋ جۇمىسى جۇرگىزىلىپ جاتىر.
«تازا قازاقستان» ۇلتتىق باستاماسى – بۇل تەك سەنبىلىك نە تازالىق اكتسياسى ەمەس. بۇل – جاڭا ەكولوگيالىق سانا قالىپتاستىرۋعا باعىتتالعان جۇيەلى جۇمىس. ء«بول، تاپسىر، قايتا وڭدە!» جوباسى مەكتەپ وقۋشىلارىنا قورشاعان ورتاعا جاۋاپكەرشىلىكپەن قاراۋدىڭ ماڭىزىن تۇسىندىرەدى. سەبەبى ءدال وسى جاس ۇرپاق ەرتەڭگى كۇنى تازا ءارى جاسىل قازاقستاندى قالىپتاستىرادى»، – دەيدى ۇيىمداستىرۋشىلار.
جوبا اياسىندا وقۋشىلارعا تابيعاتتى ايالاۋ مادەنيەتىن ەرتە جاستان ءسىڭىرۋ، تۇرمىستىق قالدىقتاردى سۇرىپتاۋ داعدىسىن دامىتۋ، جەكە ۇلەستىڭ ماڭىزىن ۇعىندىرۋ جانە قايتا وڭدەۋ سالاسىنىڭ الەۋەتىن تانىستىرۋ كوزدەلگەن.
بۇل باستاما «تازا قازاقستان» ۇلتتىق جوباسىنىڭ ماڭىزدى بولىگى رەتىندە ەكولوگيالىق ءبىلىم مەن مادەنيەتتى دامىتۋدىڭ ءتيىمدى قۇرالىنا اينالۋدا. ول تەك مەكتەپ قابىرعاسىنداعى ساباقتارمەن شەكتەلمەي، ءوڭىر تۇرعىندارىنىڭ دا تابيعاتتى قورعاۋعا دەگەن كوزقاراسىن وزگەرتۋگە ىقپال ەتۋدە.
