كوكشەتاۋ قالاسىندا كۇردەلى قايتا جاڭعىرتۋدان كەيىن تەمىرجول ۆوكزالى اشىلدى. 1981 جىلى سالىنعان نىساننىڭ عيماراتى جاڭارتىلىپ، جولاۋشىلارعا ارنالعان زاماناۋي ايماقتار مەن جاڭا ينجەنەرلىك جۇيەلەر ىسكە قوسىلدى. ۆوكزال تاۋلىگىنە 2 مىڭعا جۋىق جولاۋشىعا قىزمەت كورسەتەدى.
ناسانعا سوڭعى كۇردەلى جوندەۋ جۇمىستارى 20 جىلدان استام ۋاقىت بۇرىن جۇرگىزىلگەن. وسى ۋاقىت ىشىندە عيمارات پەن وعان ىرگەلەس اۋماق ەسكىرگەندىكتەن، قايتا جاڭعىرتۋ اياسىندا ۆوكزالدىڭ نەگىزگى ەلەمەنتتەرى تولىعىمەن جاڭارتىلدى. بۇل رەتتە عيماراتتىڭ قالىپتاسقان ساۋلەتتىك كەلبەتى ساقتالدى.
ۆوكزال ىشىندە زاماناۋي كۇتۋ زالدارى مەن اقپاراتتىق ايماقتار پايدا بولدى، كىرەبەرىس توپتارى جاڭارتىلىپ، قوناقۇي بولمەلەرى قاراستىرىلدى. نىساننىڭ قولجەتىمدىلىگىنە دە ەرەكشە كوڭىل ءبولىندى. مۇمكىندىگى شەكتەۋلى جاندارعا، قارت ادامدارعا جانە بالالى وتباسىلارعا قولايلى جاعداي جاساۋ ءۇشىن كەدەرگىسىز ورتا قالىپتاستىرىلىپ، ليفتتەر مەن ەسكالاتورلار ورناتىلدى.
ۆوكزال ماڭىنداعى اۋماق تا جاڭارتىلىپ، جاياۋ جۇرگىنشىلەر ايماقتارى اباتتاندىرىلدى. سونداي اق جارىقتاندىرۋ جۇيەسى جاڭارتىلىپ، جاسىل جەلەكتەر وتىرعىزىلدى. قوسىمشا تەمىرجول پلاتفورمالارىنا اپاراتىن جەرۇستى وتكەلىنىڭ قۇرىلىسى جالعاسۋدا. جۇمىستار اياقتالعاننان كەيىن جولاۋشىلار تەمىرجول جولدارىن قاۋىپسىز باعىت ارقىلى كەسىپ وتە الادى.
كوكشەتاۋ ۆوكزالىنىڭ اشىلۋى اقمولا وبلىسىنداعى تەمىرجول ينفراقۇرىلىمىن جاڭارتۋ بويىنشا اۋقىمدى جۇمىستىڭ اياقتالۋىن بىلدىرەدى. جالپى وڭىردە 16 ۆوكزال جاڭعىرتىلدى. وبلىس اكىمى مارات احمەتجانوۆتىڭ ايتۋىنشا، بۇل ەلىمىزدىڭ وڭىرلەرى اراسىندا جاڭارتىلعان نىساندار سانى بويىنشا ەڭ جوعارى كورسەتكىش.
«بۇل جۇمىس ءىرى قالالاردان باستاپ شاعىن ەلدى مەكەندەرگە دەيىن بۇكىل وبلىستى قامتىدى. بۇگىن ءبىز ونى اقمولا وبلىسىنىڭ ورتالىعىندا قورىتىندىلاپ وتىرمىز. الايدا باعدارلامانىڭ اياقتالۋى ءوڭىردى دامىتۋ جۇمىستارىنىڭ توقتايتىنىن بىلدىرمەيدى. كەرىسىنشە، بۇل زاماناۋي ينفراقۇرىلىمعا، تۇرعىندار، بيزنەس پەن تۋريزم ءۇشىن جاڭا مۇمكىندىكتەرگە جانە ودان ءارى دامۋعا جاسالعان تاعى ءبىر قادام»، – دەدى مارات احمەتجانوۆ.
كوكشەتاۋ ءۇشىن جاڭارتىلعان ۆوكزالدىڭ تۋريستىك ماڭىزى دا زور. قالا جىل سايىن ەلىمىزدىڭ ءار وڭىرىنەن تۋريستەر كەلەتىن بۋراباي كۋرورتتىق ايماعىنا باعىت الاتىن تەمىرجول جەلىسىندە ورنالاسقان. سوندىقتان ۆوكزالدىڭ جاڭعىرتىلۋى جولاۋشىلاردىڭ وڭىرگە كەلگەن العاشقى ساتىنەن باستاپ ساپارىن جايلى ەتۋگە مۇمكىندىك بەرەدى.
ۆوكزال عيماراتىن قايتا جاڭعىرتۋ جۇمىستارى اياقتالدى. دەگەنمەن نىسانداعى جۇمىستار ءالى دە جالعاسۋدا. اتاپ ايتقاندا، پلاتفورمالارعا اپاراتىن جەرۇستى وتكەلىنىڭ قۇرىلىسى جۇرگىزىلىپ جاتىر.
