قازاقستاندىق نۇرعالي نۇعماننىڭ الەۋمەتتىك جەلىدەگى مالىمدەمەسىنەن كەيىن الماتى پوليتسياسى كامەلەتكە تولماعان بالاعا قاتىستى زورلىق-زومبىلىق بولۋى مۇمكىن دەگەن دەرەك بويىنشا تەكسەرۋ باستادى، دەپ حابارلايدى "ادىرنا" ۇلتتىق پورتالى.
الماتى قالالىق پوليتسيا دەپارتامەنتىنىڭ ءباسپاسوز قىزمەتى حابارلاعانداي، الەۋمەتتىك جەلىلەردە تاراعان بەينەۇندەۋ بەلگىلەنگەن تارتىپپەن تىركەلىپ، پروتسەسسۋالدىق تەكسەرۋ قولعا الىنعان.
"قازىرگى ۋاقىتتا جاريالانىمدا كورسەتىلگەن بارلىق ءمان-جايلاردى، سونداي-اق وقيعانىڭ ىقتيمال قاتىسۋشىلارى مەن كۋاگەرلەرىن انىقتاۋعا باعىتتالعان ءىس-شارالار كەشەنى جۇرگىزىلۋدە. بالالارعا قاتىستى زورلىق-زومبىلىق ماسەلەلەرى قۇقىقتىق باعاسىز قالمايدى جانە ەرەكشە باقىلاۋدا بولادى", — دەلىنگەن پوليتسيا حابارلاماسىندا.
ۆەدومستۆو مالىمەتىنشە، ەگەر كورسەتىلگەن فاكتىلەر راستالسا، قازاقستان زاڭناماسىنا سايكەس ءتيىستى شارالار قابىلدانادى.
بەينەجازبادا نۇرعالي نۇعمان اكتەرلىك مانسابىنىڭ باسىندا ءوزىن «كوكە» دەپ اتاعان ادامنىڭ تاراپىنان بالا كەزىندە زورلىق-زومبىلىق كورگەنىن ايتقان. ونىڭ سوزىنشە، وقيعا تۋرالى اتا-اناسىنا نەمەسە وزگەلەرگە حابارلاعان جاعدايدا كينو سالاسىنا جولىن جاباتىنى جونىندە قورقىتۋ بولعان.
وسى جاعدايعا بايلانىستى Balapan تەلەارناسى دا رەسمي مالىمدەمە جاسادى.
ارنا تاراتقان اقپاراتقا سايكەس، 2010 جىلى اشىلعان تەلەارنا شتاتىندا اتالعان كەزەڭدە ەر ادام «پروديۋسەر» قىزمەتىن اتقارماعان.
سونىمەن قاتار ارنا مالىمەتىنشە، كەيىن نۇرعالي نۇعمان جاڭا بەينەجازبا جاريالاپ، ءسوز بولعان وقيعانىڭ Balapan تەلەارناسىنا ەمەس، كوممەرتسيالىق جوباعا قاتىستى ەكەنىن ناقتىلاعان جانە ارنا ۇجىمىنان كەشىرىم سۇراعان.
