Forbes Kazakhstan جاريالاعان ەڭ باي كاسىپكەرلەر تىزىمىندە قازاقستاننىڭ تۇڭعىش پرەزيدەنتى نۇرسۇلتان نازارباەۆ اۋلەتى تۇر، دەپ حابارلايدى “ادىرنا” ۇلتتىق پورتالى باسىلىمعا سىلتەپ.
بيىل ەلدەگى ەڭ باي 75 كاسىپكەردىڭ جيىنتىق كاپيتالى $57,5 ملرد-تان $60,84 ملرد-قا دەيىن وسكەن. تىزىمدەگى باستى وزگەرىستەردىڭ ءبىرى — بولات وتەمۇراتوۆ بايلىعىنىڭ $1,7 ملرد-قا ارتىپ، $5,4 ملرد-قا جەتۋى. سونىڭ ناتيجەسىندە ول رەيتينگتىڭ ءۇشىنشى ورنىنا كوتەرىلگەن.
ۇزاق جىلدار بويى نازارباەۆتىڭ ءىس باسقارۋشىسى قىزمەتىن اتقارعان وتەمۇراتوۆ حالىقارالىق ساراپشىلار تاراپىنان ەكس-پرەزيدەنتتىڭ ەڭ جاقىن سەرىكتەرىنىڭ ءبىرى رەتىندە اتالىپ كەلەدى. ونىڭ ۇلى ءاليدار وتەمۇراتوۆ تا Forbes تىزىمىندە 57-ورىندا تۇر. ونىڭ كاپيتالى $186 ملن دەپ باعالانعان.
رەيتينگتە ءۇشىنشى ورىندى تيمۋر قۇلىباەۆ پەن دينارا قۇلىباەۆا ءبولىسىپ وتىر. ارقايسىسىنىڭ بايلىعى $5,4 ملرد كولەمىندە. ولار «المەكس» حولدينگى ارقىلى ەلىمىزدەگى ەڭ ءىرى قارجى ۇيىمدارىنىڭ ءبىرى — Halyk Bank اكتسيالارىنىڭ 61,99%-ىن باقىلايدى.
20-ورىندا داريعا نازارباەۆا ورنالاسقان. ونىڭ بايلىعى $550 ملن دەپ كورسەتىلگەن. ال ونىڭ ۇلى، نازارباەۆتىڭ نەمەرەسى نۇرالى اليەۆ 41-ورىنعا جايعاسقان. ونىڭ كاپيتالى $280 ملن-عا باعالانعان. اناسى مەن ۇلى مەديااكتيۆتەرگە، سونىڭ ىشىندە «ەۆروپا پليۋس قازاقستان» راديوسى مەن نتك تەلەارناسىنا يەلىك ەتەدى.
تىزىمدەگى تاعى ءبىر ىقپالدى تۇلعا — عالىمجان ەسەنوۆ. ول Forbes رەيتينگىندە 19-ورىنعا كوتەرىلىپ، بايلىعى $564 ملن دەپ ەسەپتەلگەن. بۇعان دەيىن نازارباەۆ قورىمەن بايلانىستىرىلعان قۇرىلىمداردان Jusan Bank اكتسيالارىن العاننان كەيىن، ەسەنوۆ بانكتىڭ جالعىز يەسىنە اينالدى.
سونداي-اق رەيتينگتە كەڭەس راقىشەۆ بار. ونىڭ بايلىعى $402 ملن كولەمىندە باعالانعان. ول دا بۇرىننان نازارباەۆ اۋلەتىنە جاقىن كاسىپكەرلەر قاتارىندا اتالىپ كەلەدى.
وسىلايشا، Forbes Kazakhstan رەيتينگىندە كەمىندە جەتى ادامنىڭ اكتيۆتەرى تۇڭعىش پرەزيدەنتتىڭ وتباسى نەمەسە جاقىن ورتاسىمەن تىكەلەي نە جاناما بايلانىستى ەكەنى بايقالادى. ولاردىڭ جيىنتىق كاپيتالى $17 ملرد-تان اسىپ، تىزىمدەگى بارلىق بايلىقتىڭ تورتتەن بىرىنەن كوپ بولىگىن قۇراپ وتىر.
