قازاقستانداعى "ۇرتىنان ماي اققان" بايلاردىڭ جاڭا ءتىزىمى جاريالاندى. 2023 جىلى قازاقستاندىق كاسىپكەرلەردىڭ جالپى بايلىعى 23,9 ميلليارد دوللار بولعان. بۇل تۋرالى "ادىرنا" ۇلتتىق پورتالى Forbes.kz-كە سىلتەمە كورسەتە وتىرىپ حابارلادى.
دەگەنمەن دەرەكتەر قازاقستاندىق داۋلەتتى كاسىپكەرلەردىڭ جالپى اكتيۆتەرىنىڭ تومەندەگەنىن كورسەتەدى. ماسەلەن، 2022 جىلى اۋقاتتىلاردىڭ تىزىمىنە ەنگەندەردىڭ داۋلەتى 25,3 ميلليارد دوللار بولعان.
Forbes Kaspi.kz اكتسيونەرى ميحايل لومتادزەنى وسى جىلى گرۋزيانىڭ داۋلەتتىلەر تىزىمىنە ەنگىزگەن. ال بىلتىر قازاقستاندىق پاسپورتقا يە بولعان تيمۋر تۋرلوۆ بايلىعىن 900 ملن دوللارعا ەسەلەگەن. ول بايلاردىڭ تىزىمىندە 5-ورىندا تۇر.
Forbes ەسەبىنشە، قازاقستاندىق اۋقاتتىلاردىڭ تىزىمىندەگى جاڭا ەسىم – Orbis Kazakhstan ديرەكتورلار كەڭەسىنىڭ توراعاسى فاررۋح ماحمۋدوۆ. ول رەيتينگتىڭ 22-ورنىنا جايعاستى. كومپانيا پورتفوليوسىنا ەلدىڭ 12 قالاسىندا 33 اۆتو ورتالىعى بار Orbis Auto ديلەرلىك جەلىسى كىرەدى. سونداي-اق كاسىپكەر «اقسايگازسەرۆيس» اق-قا يەلىك ەتەدى.
قۇلىباەۆتار جۇبى ءبىر جىلدا داۋلەتتەرىن 800 ملن دوللارعا ارتتىرعان. ولار 2 جانە 3-ورىندارىن ساقتاپ قالدى.
بايلىعى 590 ملن دوللارعا باعالانعان داريعا نازارباەۆا 14-ورىنعا ءتۇستى. ول ءوز يەلىگىندەگى «DLS Group حولدينگتىك كومپانياسى» جشس ارقىلى «ايماق-مەديا» جشس، «A-Service Management» جشس (استاناداعى 4 جۇلدىزدى «دۋمان» قوناق ءۇيى) ۇلەستەرىن يەمدەنىپ وتىر. سونداي-اق ۇلى نۇرالي اليەۆپەن (رەيتينگتەگى №29) بىرگە «ەۋروپا پليۋس قازاقستان» جشس-عا يەلىك ەتەدى.
ال قازاقستاندىق بايلاردىڭ كوشباسىندا ۆلاديمير كيم تۇر. ونىڭ داۋلەتى – 4 ملرد 600 ملن دوللار. ول KAZ Minerals Ltd-نىڭ 63,5%-ىنا، Kazakhmys Copper اق-نىڭ 70%-ىنا («قازاقمىس كورپوراتسياسى» جشس كىرەدى), «بانك RBK»اق-نىڭ 89,71%-ىنا يەلىك ەتەدى.
ەسكە سالا كەتسەك، بۇگىن سەنات توراعاسى ماۋلەن اشىمباەۆ تىلشىلەردىڭ «نازارباەۆتىڭ تۋىستارىنىڭ قالاي بايىعانى تەكسەرىلۋى كەرەك پە؟» دەگەن سۇراعىنا جاۋاپ بەرگەن ەدى.
"ادىرنا" ۇلتتىق پورتالى
