رەسەيلىك تاۋەلسىز زەرتتەۋ باسىلىمى «پروەكت» ماسكەۋدەگى ۆوروبەۆ تاۋلارىنداعى ەليتالىق ساياجايلاردىڭ فەدەرالدىق كۇزەت قىزمەتى (فسو) ارقىلى بيلىككە جاقىن ساياساتكەرلەر مەن بيزنەسمەندەرگە جالعا بەرىلەتىنى تۋرالى زەرتتەۋ جاريالادى. باسىلىم دەرەگىنشە، وسى جابىق كەنتتىڭ «تۇرعىندارى» قاتارىندا قازاقستاننىڭ بۇرىنعى پرەزيدەنتى نۇرسۇلتان نازارباەۆ تا بار، دەپ حابارلايدى "ادىرنا".
ماتەريالعا سۇيەنسەك، كوسىگين كوشەسىندەگى بۇل ەليتالىق كەنت 1950 جىلدارى كسرو-نىڭ جوعارى باسشىلىعى – كوكپ ورتالىق كوميتەتىنىڭ مۇشەلەرى ءۇشىن ارنايى سالىنعان. ول «موسفيلم» پاۆيلوندارى مەن كينو مۇراجايىنىڭ ءدال جانىندا ورنالاسقان.
2015 جىلى فسو اۋماقتاعى بارلىق رەزيدەنتسيالارعا اۋقىمدى رەكونسترۋكتسيا جاساعان. سول ۋاقىتتان بەرى ساياجايلار تەك «جابىق ءتىزىم» ارقىلى – جوعارى لاۋازىم يەلەرىنىڭ جەكە رۇقساتىمەن عانا جالعا بەرىلەدى.
«پروەكت» مالىمەتىنشە، بۇل كەنتكە كىرۋ تەك رەسەي پرەزيدەنتى ۆلاديمير ءپۋتيننىڭ جانە ونىڭ اكىمشىلىك باسشىسى انتون ۆاينونىڭ رۇقساتىمەن مۇمكىن بولادى. ەليتالىق ءۇيدى جالعا الۋ قۇنى ايىنا شامامەن 3,1 ميلليون ءرۋبلدى قۇرايدى.
نازارباەۆپەن ءبىر تىزىمدە كورسەتىلگەن كورشىلەر مىنالار:
- قاۋىپسىزدىك كەڭەسىنىڭ حاتشىسى سەرگەي شويگۋ;
- قورعانىس ءمينيسترىنىڭ ورىنباسارى – باس شتاب باستىعى ۆالەري گەراسيموۆ;
- پرەزيدەنت اكىمشىلىگىنىڭ باسشىسى انتون ۆاينو;
- فەدەراتسيا كەڭەسىنىڭ مۇشەسى سۇلەيمان كەريموۆ;
- وليگارحتار رومان ابراموۆيچ، گەننادي تيمچەنكو جانە دميتري مازەپين;
رامزان قادىروۆقا جاقىن بيزنەسمەن رۋسلان بايساروۆ.
زەرتتەۋ بويىنشا، نۇرسۇلتان نازارباەۆقا ميچۋرين داڭعىلىنا جاقىن ورنالاسقان №2 ءۇي بەكىتىلگەن. الايدا ول بۇل رەزيدەنتسيادا تۇراقتى تۇرمايدى، تەك مەزگىل-مەزگىل بارىپ تۇرادى دەپ كورسەتىلگەن.
دەرەككوزدەردىڭ ايتۋىنشا، بۇل ۇيلەردە تۇرۋ ارنايى جايلىلىق ءۇشىن ەمەس، بيلىككە جاقىندىقتىڭ سيمۆولى رەتىندە قابىلدانادى. ەليتالىق تىزىمدە نازارباەۆتىڭ بولۋى ونىڭ رەسەيدىڭ ىقپالدى تۇلعالارى اراسىنداعى مارتەبەسىن كورسەتەدى.
