بۇگىن بەلگىلى حالىق اقىنى، فولكلورشى، سازگەر شاكىر ابەنوۆتىڭ تۋعانىنا 125 جىل تولدى، دەپ حابارلايدى «ادىرنا» ءتىلشىسى.
ول 1901 جىلى اباي وبلىسى، اباي اۋدانى، قۇندىزدى اۋىلىندا تۋعان. ەڭ العاش شىققان «بورسىقتار» اتتى ولەڭى 1916 جىلى «ايقاپ» جۋرنالىندا باسىلعان. ۇلى وتان سوعىسىنا قاتىسىپ، جارالانىپ مايداننان ەلگە ورالعان. سوۆحوزدا جۇمىس ىستەي ءجۇرىپ شىعارماشىلىقپەن دە اينالىسقان. اقىن قالامىنان تۋعان «قوزى كورپەش – بايان سۇلۋ»، «كەيپىن باتىر»، «ورتاق ارال»، «تاڭشەبەر-جاپال» پوەمالارى كوپشىلىكتىڭ كوڭىلىنەن شىققان.
ەسكى شەجىرە، حالىق ادەبيەتىنىڭ بىلگىرى جاناق، سابىرباي، تۇبەك، دۋلات، بايكوكشە سەكىلدى اقىنداردىڭ مۇراسىن تۇڭعىش رەت قاعازعا تۇسىرگەن. مۋزىكا ماماندارى شاكىر ابەنوۆتىڭ ايتۋىمەن كوپتەگەن ءان مەن كۇيلەردى نوتاعا جازىپ العان.
شاكىر ابەنوۆ – تۇڭعىش پرەزيدەنت نۇرسۇلتان نازارباەۆتىڭ انت بەرۋ راسىمىندە ءبىرىنشى باتا بەرگەن اقساقال. 91 جاستاعى اقىن باتاسىندا حالىقتان كەشىرىم سۇراپ، ءوز قاتەسىن ءوزى تۇزەۋ كەرەكتىگىن ايتقان ەدى.
«نەگىزگى باتا – نۇرسۇلتانعا حالىقتىڭ باتاسى. ول ءۇشىن ءۇش مىندەت اتقارۋى كەرەك. ءبىرىنشى، جۇمىسكەر، ديحانشى، مال ءوسىرۋشى شارۋالاردىڭ ەڭبەگىنە ىسىراپ جاساتپاي، دۇرىس باسشىلىق بەرىپ باقىلاپ وتىرۋ. ەكىنشى، حالىققا زيان كەلتىرەتىن زورلىقشىل زۇلىمدارعا اياۋسىز جازا بەرىپ، تىيىم سالۋ. ءۇشىنشى، الدەقانداي سەبەپپەن ءوزى قاتالاسسا، حالىقتان كەشىرىم سۇراپ، ءوز قاتاسىن ءوزى تۇزەۋ»،- دەگەن ەدى حالىق اقىنى.
ونىڭ بەرەتىن باتاسىنىڭ ءماتىنىن ەشكىم الدىن-الا تەكسەرمەگەن، سەبەبى اقساقال ايتار ءسوزىن قاعازعا جازىپ، دايىندامايتىنىن جەتكىزگەن.
