سەنات توراعاسى ماۋلەن اشىمباەۆ باتىس قازاقستان وبلىسىندا ەڭبەك ۇجىمدارىمەن، ءماسليحات دەپۋتاتتارىمەن، قازاقستان حالقى اسسامبلەياسىنىڭ مۇشەلەرىمەن، جەرگىلىكتى جۇرتشىلىقپەن جانە جاستارمەن كەزدەسۋلەر وتكىزدى.
كەزدەسۋلەر بارىسىندا مەملەكەت باسشىسى قاسىم-جومارت توقاەۆ ۇلتتىق قۇرىلتايدىڭ IV وتىرىسىندا جۇكتەگەن مىندەتتەردى ىسكە اسىرۋ جانە سەناتتىڭ وڭىرلەردى دامىتۋعا ىقپالىن كۇشەيتۋ ماسەلەلەرى تالقىلاندى.
وبلىس جۇرتشىلىعىمەن وتكەن كەزدەسۋدە ماۋلەن اشىمباەۆ ادىلەتتى، قاۋىپسىز جانە قۋاتتى قازاقستان قۇرۋ جولىنداعى رەفورمالاردىڭ ماڭىزدىلىعىن اتاپ ءوتتى. ول ساياسي-ەكونوميكالىق وزگەرىستەردى جۇزەگە اسىرۋ ءۇشىن بارلىق دەڭگەيدەگى مەملەكەتتىك ورگاندار مەن قوعامنىڭ بەلسەندىلىگى قاجەت ەكەنىن ايتتى.
«پرەزيدەنتىمىز قاسىم-جومارت كەمەلۇلى توقاەۆ ۇلتتىق قۇرىلتايدىڭ IV وتىرىسىندا ەلىمىزدى دامىتۋعا قاتىستى وزەكتى ماسەلەلەرگە كەڭىنەن توقتالدى. وڭىرلەردىڭ ەكونوميكاسىن وركەندەتۋ نەگىزگى باعىتتاردىڭ ءبىرى رەتىندە بەلگىلەندى. قۇرىلتايدا ىشكى ساياسات، يدەولوگيا، ءبىلىم بەرۋ ماسەلەلەرىنە دە ەرەكشە نازار اۋدارىلدى. ايتىلعان بارلىق باستامالار ادىلەتتى، قاۋىپسىز، تازا جانە قۋاتتى قازاقستان قۇرۋ يدەياسىن ىسكە اسىرۋعا ارنالعان. وسى جانە باسقا دا مىندەتتەردى ساپالى ىسكە اسىرۋ ءۇشىن جۇيەلى ءارى ءتيىمدى جۇمىس ىستەۋىمىز كەرەك»، – دەپ، سەنات توراعاسى وبلىستىق ءماسليحات دەپۋتاتتارىن ورتاق ماقساتتارعا قول جەتكىزۋ ءۇشىن پالاتانىڭ زاڭ شىعارۋ قىزمەتىنە بەلسەندى قاتىسۋعا شاقىردى.
سەنات توراعاسىنىڭ ايتۋىنشا، وڭىرلەردىڭ تۇراقتى دامۋى ءۇشىن ينۆەستيتسيالار تارتۋ، جاڭا كاسىپورىندار اشۋ، اۋىل شارۋاشىلىعى مەن وڭدەۋشى ونەركاسىپتى قولداۋ ماڭىزدى. بۇل باعىتتا سەنات ماسليحاتتارمەن بىرلەسىپ، زاڭنامالىق جۇمىستاردى جەتىلدىرۋدى جالعاستىرادى.
جاستارمەن كەزدەسۋدە ماۋلەن اشىمباەۆ ەل دامۋىنا جاس بۋىننىڭ قوساتىن ۇلەسى ەرەكشە ەكەنىن اتاپ ءوتتى. ول ءبىلىمدى، جاڭاشىل جاستار قازاقستاننىڭ جارقىن بولاشاعىن قالىپتاستىرۋدا ماڭىزدى ءرول اتقاراتىنىن ايتىپ، ولارعا مەملەكەت تاراپىنان جاسالىپ جاتقان قولداۋلارعا توقتالدى.
ساپار بارىسىندا سەناتورلار وتكەن جىلعى سۋ تاسقىنىنان زارداپ شەككەن تۇرعىندارعا ارنالىپ سالىنعان جاڭا ۇيلەردى ارالادى. سونداي-اق، جاڭادان اشىلعان «اقجايىق» وڭالتۋ ورتالىعىنىڭ جۇمىسىمەن تانىستى.
وڭىردەگى ءوندىرىس ورىندارىن ارالاۋ بارىسىندا «Packaging Systems» جشس جانە «كۆانت» جيھاز فابريكاسىنىڭ قىزمەتى تانىستىرىلىپ، ءوندىرىستى كەڭەيتۋ جانە ينۆەستيتسيا تارتۋ ماسەلەلەرى قارالدى.
سەنات توراعاسى ماۋلەن اشىمباەۆ وبلىستا بىرقاتار جۇمىستار ءساتتى ىسكە اسىپ جاتقانىن ەرەكشە اتاپ ءوتتى.
“باتىس قازاقستان وبلىسى ءتۇرلى باعدارلامالار ءساتتى ىسكە اسىرىلىپ، ەكونوميكاسى تۇراقتى ءوسىپ كەلە جاتقان وڭىرلەردىڭ ءبىرى! وسى رەتتە وبلىس اكىمى تورەعاليەۆ ناريمان تورەعاليۇلىنىڭ بەلسەندى جۇمىسىن اتاپ وتكەن ءجون. ناريمان تورەعاليۇلى بىلىكتى باسشى، شەبەر ۇيىمداستىرۋشى، ءبىزدىڭ ارىپتەسىمىز. سەناتور رەتىندە دە ناتيجەلى ەڭبەك ەتتى. قازىرگى تاڭدا اكىمنىڭ تۇرتكى بولۋىمەن كوپتەگەن ىرگەلى ىستەر قولعا الىنعانىن بىلەمىز!” - دەدى ماۋلەن اشىمباەۆ.
سەنات وڭىرلەردىڭ دامۋىنا ىقپال ەتەتىن باستامالاردى قولداۋدى جالعاستىرادى.
