«ادىلەت» ساياسي پارتياسىنىڭ قۇرىلتاي سەزىندە پارتيانىڭ مۇشەسى رەنات بەكتۇروۆ باق وكىلدەرىنىڭ سۇراقتارىنا جاۋاپ بەردى، دەپ حابارلايدى "ادىرنا" ۇلتتىق پورتالى.
استانا حالىقارالىق قارجى ورتالىعىنىڭ باسقارۋشىسى ءارى پارتيانىڭ باسقارۋشىلار توبىنىڭ مۇشەسى بەكتۇروۆ پارتيانىڭ باستى ماقساتى ادىلەتتى قازاقستان قۇرۋ ەكەنىن اتاپ ءوتتى.
«ادىلەت» پارتياسىنىڭ جارعىسى 18 بولىمنەن تۇرادى. ال پارتيا باعدارلاماسىندا بەس نەگىزگى قۇندىلىق بەلگىلەنگەن. ولار – ادىلەتتىلىك، وتانسۇيگىشتىك، ەڭبەكقورلىق، جاۋاپكەرشىلىك جانە پروگرەسس.
«بۇل قۇندىلىقتار تەك قاعاز جۇزىندە قالماي، قوعام مەن ەكونوميكادا ناقتى كورىنىس تابۋى ءتيىس. سوندىقتان ءبىزدىڭ نەگىزگى باسىمدىقتارىمىز ايقىندالعان. سونىڭ ءبىرى – زاڭ مەن ءتارتىپ»، – دەدى رەنات بەكتۇروۆ.
قازىرگى ۋاقىتتا «ادىلەت» پارتياسى قازاقستان رەسپۋبليكاسى ادىلەت مينيسترلىگىنىڭ رەسمي تىركەۋىنەن ءالى وتپەگەن. پارتيا وكىلدەرىنىڭ ايتۋىنشا، قازىر قاجەتتى قۇجاتتاردى جيناۋ پروتسەسى ءجۇرىپ جاتىر.
