اقش پرەزيدەنتى دونالد ترامپتىڭ ۇلدارى قازاقستانداعى ۆولفرام كەن ورىندارىن يگەرۋ جوباسىنا قاتىساتىن ۇلەسكە يە بولدى. بۇل تۋرالى ءوز دەرەككوزدەرىنە سىلتەمە جاساپ Financial Times گازەتى جازدى، دەپ حابارلايدى “ادىرنا”.
دەرەككوزدەرگە سۇيەنسەك، ترامپتىڭ ۇلدارى وتكەن جىلى Skyline Builders قۇرىلىس كومپانياسىنىڭ ۇلەسىن ساتىپ العان. بىراق ولار مۇنى تىكەلەي ەمەس، Dominari Securities LLC ينۆەستيتسيالىق-كونسالتينگتىك فيرماسىمەن بايلانىستى قۇرىلىم ارقىلى جۇزەگە اسىرعان.
ودان كەيىن Skyline ازياداعى ماڭىزدى مينەرالدىق اكتيۆتەرى بار كومپانيانىڭ 20% ۇلەسىن 20 ميلليون دوللارعا ساتىپ الۋعا شەشىم قابىلداعان. باسىلىمنىڭ جازۋىنشا، بۇل Cove Capital ينۆەستيتسيالىق توبىنىڭ ەنشىلەس كومپانياسى.
گازەتكە سايكەس، Cove Capital مەن «قازاقستاننىڭ ۇلتتىق تاۋ-كەن كومپانياسى» ۆولفرامنىڭ ءىرى، بارلانعان، بىراق ءالى يگەرىلمەگەن كەن ورنىن دامىتۋ جونىندە كەلىسىم جاساعان. كەيىن Cove Capital قۇرىلىمدارى Skyline-مەن بىرىگۋگە كەلىسكەن. ناتيجەسىندە Kaz Resources اتتى جاڭا كومپانيا قۇرىلىپ، ول Nasdaq بيرجاسىنا شىعۋعا دايىندالىپ جاتىر.
30 ساۋىردە Kaz Resources كومپانياسىنىڭ رەسمي سايتىندا ءباسپاسوز-رەليزى جاريالانىپ، Skyline Builders Group Holding Ltd پەن Cove Kaz Capital Group LLC بىرىگۋ تۋرالى كەلىسىمگە كەلگەنى راستالدى.
بىرىككەن كومپانيا اقش-قا ۆولفرام، سيرەك جەر ەلەمەنتتەرى جانە باسقا دا ماڭىزدى مينەرالداردى جەتكىزەدى.
پرەسس-رەليزدە Skyline كومپانياسى وسى مامىلە ارقىلى «اقش ءۇشىن نەگىزگى ستراتەگيالىق مينەرال جەتكىزۋشىگە اينالۋ» ماقساتىن ورىندايتىنى ايتىلعان. سونىمەن قاتار Kaz Resources تەك ۆولفرام عانا ەمەس، ليتي، بەريللي، تانتال، نيوبي جانە رۋبيدي سياقتى ەلەمەنتتەردى دە جەتكىزۋگە دايىن ەكەنى كورسەتىلگەن.
سونداي-اق بىرىگۋ مامىلەسىنە قازاقستاندا 15 ليتسەنزياسى بار KAZ Critical Minerals اتتى تاعى ءبىر امەريكالىق كومپانيا دا قاتىسادى.
پرەسس-رەليزگە سايكەس، مامىلەنىڭ نەگىزى – تاۋ-كەن سامۇرىق كومپانياسىنان «سولتۇستىك قاتپار» جشس-ءنىڭ 70% ۇلەسىن ساتىپ الۋ.
بۇل كومپانيا قاراعاندى وبلىسىنداعى ەكى كەن ورنىنا ليتسەنزيا يەسى:
- «سولتۇستىك قاتپار»
- «جوعارعى قايراقتى»
«تاۋ-كەن سامۇرىق» مالىمەتىنشە، سولتۇستىك قاتپار قورى ورتاشا، ال جوعارعى قايراقتى — بىرەگەي، الەمدەگى ەڭ ءىرى ءۇش ۆولفرام كەن ورنىنىڭ ءبىرى (قورى 1 ميلليون توننادان اسادى).
21 ساۋىردە «تاۋ-كەن سامۇرىق» بۇل مامىلە تۋرالى مالىمدەمە جاساپ، كەن ورىندارى ساتىلمايتىنىن اتاپ ءوتتى. سونىمەن قاتار Cove Capital بىرلەسكەن كاسىپورىنداعى جارعىلىق كاپيتالدىڭ 70% ۇلەسىن الاتىنى راستالدى.
كەلىسىم بويىنشا:
- ينۆەستور 1 ميلليارد دوللاردان استام قارجى سالادى;
- تەحنيكالىق جانە وپەراتسيالىق تاۋەكەلدەردى ءوز موينىنا الادى.
كومپانيا قازاقستان ستراتەگيالىق باقىلاۋدى ساقتايتىنىن ەرەكشە اتاپ ءوتتى.
سونىمەن قاتار جوبا ءونىمدى قازاقستان اۋماعىندا وندىرۋگە باعىتتالعان، قوسىلعان قۇن قالىپتاستىرۋعا، جاڭا جۇمىس ورىندارىن اشۋعا، سالىق تۇسىمدەرىن ارتتىرۋعا مۇمكىندىك بەرەدى.
حابارلامادا حالىقارالىق سەرىكتەس ۆولفرام ونىمدەرىنە تۇراقتى نارىق اشاتىنى دا ايتىلعان.
ساراپشىلار سيرەك جەر ەلەمەنتتەرىن «جاڭا مۇناي» دەپ اتايدى، سەبەبى ولار قازىرگى تەحنولوگيالىق ەكونوميكا ءۇشىن اسا ماڭىزدى.
ولار ەلەكترونيكادا جانە قورعانىس ونەركاسىبىندە كەڭ قولدانىلادى.
قازىرگى تاڭدا بۇل سالادا قىتاي كوش باستاپ تۇر. Bloomberg ساراپشىلارىنىڭ ايتۋىنشا، قىتاي سيرەك مەتالداردى اقش-پەن ساۋدا قاقتىعىسىندا قىسىم قۇرالى رەتىندە قولدانادى.
مىسالى، وتكەن جىلى ترامپ ەنگىزگەن باج سالىعىنا جاۋاپ رەتىندە قىتاي سيرەك جەر ەلەمەنتتەرىنىڭ ەكسپورتىنا شەكتەۋلەر ەنگىزگەن.
سوندىقتان اقش بۇل رەسۋرستارعا بالاما جەتكىزۋ جولدارىن ىزدەۋدە.
ەسكە سالساق، وسى جىلدىڭ اقپانىندا دونالد ترامپ قىتايعا تاۋەلدىلىكتى ازايتۋ ءۇشىن قۇنى 12 ميلليارد دوللار بولاتىن ستراتەگيالىق مينەرالدار قورىن قۇرۋ جوسپارىن جاريالاعان.
